Estoke vasina Pfizer hahú mamuk iha armazein SAMES
DILI,30 setembru 2022 (TATOLI)—Diretór Ezekutivu Servisu Autonómu Medikamentu no Ekipamentu Saúde (SAMES), Santana Martins, informa daudaun ne’e estoke vasina Pfizer hahú mamuk iha armazein nasionál.
“Estoke vasina Pfizer, durante ne’e ita simu husi parseiru sira iha 30 setembru 2020, ohin espiradu ona ka ramata. Maibé ita halo exersísiu lubuk ida katak iha vial 150 mak semana kotuk distribui ikus ba munisípiu Baucau. Nune’e espera katak sira bele utiliza hotu ohin lokraik ida ne’e no daudaun ne’e estoke hahú mamuk ona,” Diretór Ezekutivu Santana Martins, hateten iha salaun MS-Caicoli, sesta ne’e.
Nune’e, nia dehan SAMES hahú komunika ho Fundu Nasaun Unida ba Labarik (UNICEF) atu apoia tan vasina Pfizer.
“Ami halo hela esforsu oinsá mak UNICEF bele subtitui fali Pfizer ida ne’e, ami halo komunikasaun kuaze fulan-ida nia laran atu halo transportasaun, maibé tuir oráriu vasina sei to’o iha loron 3 fulan-outubru,” katak.
Diretór Ezekutivu ne’e espera katak vasina foun bele to’o mai atu utiliza ba ema ne’ebé hakarak simu sira nia doze datoluk, maibé kuantidade vasina mak seidauk iha númeru ezatu.
Tuir dadus husi Ministériu Saúde katak populasaun elijível tinan 18 ba leten ne’ebé simu ona vasina to’o iha loron 26 setembru 2022, tuir sistema informasaun Saúde iha Ministériu Saúde, hanesan kumulativu 1ª doze iha Dili hamutuk 89,5% no kumulativu 2ª doze iha Dili hamutuk 86,0% no doze datoluk iha Dili 29,9%.
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 87,9%, simu ona doze daruak 77,7% no doze datoluk 27,4%
Jornalista : Felicidade Ximenes
Editór : Florencio Miranda Ximenes
