iklan

NASIONÁL, HEADLINE, KAPITÁL

Governu aloka $3.000 kada tinan responde nesesidade rusa iha Jaco

Governu aloka $3.000 kada tinan responde nesesidade rusa iha Jaco

Bibi Rusa hadau malu bee iha illa Jaco. Imajen Tatoli/Jogerjo Guterres

DILI, 03 outubru 2022 (TATOLI)—Xefe Departamentu Área Protejida iha Ministériu Agrikultura no Peska (MAP), Pedro Pinto, hateten, Governu aloka orsamentu $3.000 kada tinan hodi responde ba nesesidade rusa iha illa Jaco.

“Governu aloka orsamentu ba Diresaun Nasionál Protesaun Konservasaun Floresta no Dezenvolvimentu Eko-Turizmu (DNPKFDET) ho montante $2.000 to’o $3.000 hodi responde nesesidade animál rusa illa Jaco. Ida-ne’e ita lori tan bee tonelada hitu ba Jaco,” Pedro Pinto informa ba Agência Tatoli, iha ninia knaar fatin, Caicoli, segunda ne’e.

Ho orsamentu ne’ebé iha, diresaun halo jestasaun lori bee hosi Walu bá Jaco hodi enxe ba fatin sira ne’ebé prepara ba rusa.

“Foin lalais rusa balun mate, ida-ne’e la’ós tanba bee laiha maibé tanba fatór hamlaha no idade, maibé ita sempre halo intervensaun nune’e ba oin  labele mate tan,” nia akresenta.

Notísia relevante: Rusa iha illa Jaco falta hahán

Aleinde ne’e, nia rekoñese, hahán sai problema tanba kuantidade rusa aumenta no bainhira sira buka hahán no hemu bee hadau malu ho forsa maka bele hetan maibé la forsa ikus  mai la hetan.

“Tuir informasaun rusa ne’ebé daudaun iha Jaco hamutuk 300, maibé ita seidauk iha dadus loloos, tanba ne’e ita iha planu sei halo peskiza didi’ak hodi hatene totál rusa, nune’e bainhira barak liu ita tenke lori sai balun ba tau iha parke ka área protejidu hanesan Tutuala nune’e sira labele mate tanba hamlaha,” nia tenik.

Tuir informasaun hosi Guarda Florestál, grupu rusa bainhira atu hemu bee bele to’o litru 40 to’o 60.

“Alternativu mak ita agora kontinua nafatin oferese bee to’o tempu udan, tanba tempu udan hahán no bee ba rusa la susar ona,” nia dehan.

Xefe Departamentu Área Protejida apela ba populasaun sira iha tempu bailoron hanesan ne’e tenke kuidadu animál sira hodi dada turista sira mai vitiza.

Jornalista   : Arminda Fonseca

Editora        : Julia Chatarina

iklan
iklan

One Comment

Leave a Reply

iklan
error: Content is protected !!