DILI, 05 outubru 2022 (TATOLI)–Ministru Edukasaun Juventude no Desportu (MEJD), Armindo Maia, konsidera profesór sira presiza hetan formasaun adukuadu atu hasa’e abilidade no koñesimentu, nune’e bele hetan kualidade edukasaun di’ak.
“Transformasaun edukasaun ne’e hahú hosi profesór sira, signifika investe iha profesór sei investe ba futuru edukasaun nian,” Ministru hateten iha ámbitu loron mundiál ba profesór sira, iha Palásiu Governu, kuarta ne’e.
Tuir governante ne’e, VIII Governu Konstitusionál liuhosi MEJD kontinua tau nafatin importánsia hodi garante kualidade edukasaun di’ak.
“Ida-ne’e obrigasaun, devér no morál ba Governu liuhosi Ministériu Edukasaun, maibé ita la servisu mesak, ita hamutuk ho parseiru dezenvolvimentu no igreja katólika inklui kongregasaun relijioza sira hotu ne’ebé eziste iha ita-nia rain,” nia akresenta.
Notísia relevante: MEJD prepara kontratu ba profesór voluntáriu 2.111 submetidu vaga
Aleinde ne’e, Governu buka hakas-an nafatin hodi tau-matan ba bem estár profesór sira atubele hetan tratamentu dignu nune’e sira bele garante prosesu ensinu aprendizajen di’ak no responsabilidade ba progresu estudante sira iha futuru.
“Ministériu Edukasaun Juventude no Desportu sei la servisu mesak, maibé kontinua halo nafatin kooperasaun di’ak ho parseiru dezenvolvimentu sira atu nune’e bele aselera prosesu ho di’ak atubele fó nafatin apoiu másimu ba progresu profesór sira,” nia tenik.
Biban ne’e, Ministru hato’o parabéns ba profesór sira hotu iha Timor-Leste inklui sira ne’ebé namkari iha rai seluk.
“Dezeju votu de susesu ba profesór sira tanba ohin bele selebra loron mundiál ba profesór sira,” nia felisita.
Jornalista : Tomé Amado
Editora : Julia Chatarina
