DILI, 06 outubru 2022 (TATOLI)-Primeiru Ministru (PM), Taur Matan Ruak, deklara sei la simu subsídiu fim anu ba kada família ho valór $200 ne’ebé hetan ona aprovasaun hosi Konsellu Ministru.
Dekretu-lei ne’e aprezenta hosi Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, ba alterasaun dahuluk dekretu-lei númeru 37/2022, loron 25 maiu.
“Sé mak lakohi hetan bele entrega fali ba ema seluk ou ema kiak sira ho konsensia, por ezemplu ha’u la simu”, Xefe Governu ba jornalista sira hafoin hasoru Prezidente Repúblika, José Ramos Horta, iha Palásiu Prezidensiál Bairru Pite, kinta ne’e.
Notísia relevante: Xefe Estadu prefere subsídiu $200 fó ba família vensimentu ki’ik-ki’ak sira
Bainhira simu mak ajuda fali ema seluk, tuir nia hatudu ona ispíritu domin ba ema seluk. “Ha’u uluk Prezidente Repúblika kontra pensaun vitalisa no saida mak halo, fó bolsu estudu ba joven sira no agora cesta bázika mós la simu, entaun bele halo tuir duke ita ko’alia”, afirma.
Nia hatutan dekretu lei ne’e seidauk haruka ba Prezidente Repúblika.”Governu sei haruka mai, iha opsaun rua; ida universál, ema hotu-hotu ne’ebé nia iha kondisaun nia foti ninian fó ba ema seluk ou nia la simu, seluk mak ba de’it sira ne’ebé kondisaun vuneravel ki’ak”.
Notísia relevante: Membru Governu deside la simu subsídiu $200
Jornalista : Nelson de Sousa
Editora : Rita Almeida
