iklan

NASIONÁL, HEADLINE, KAPITÁL

PR husu família Jape hamutuk ho Governu dezenvolve ekonomia Timor-Leste

PR husu família Jape hamutuk ho Governu dezenvolve ekonomia Timor-Leste

Oan hosi Jape Kong Su akompaña mate-isin hodi haloot iha Hera, kinta (06/10). Imajen Tatoli/Jogerjo Guterres

DILI, 06 outubru 2022 (TATOLI)--Prezidente Repúblika (PR), José Ramos Horta, husu ba família Jape Kong Su, liuliu oan no bei-oan atu hamutuk nafatin ho Governu hodi dezenvolve ekonomia Timor-Leste hodi moris di’ak ba povu Timor-Leste.

 “Lori entidade hotu nia naran atu hateten ba família Jape Kong Su, katak rai ida-ne’e simu imi atu hamutuk ita bele hadi’a rai ne’e ninia ekonomia no hadi’a povu nia moris,” PR hato’o pedidu ne’e iha ámbitu serimónia fúnebre Na’in ba Timor Plaza, Jape Kong Su, iha Hera, postu administrativu Cristo Rei, munisípiu Dili, kinta ne’e.

Xefe Estadu koñese istória no kontribuisaun Jape Kong Su desde tempu portugés to’o ukun-an.

“Ha’u hanesan timor-oan barak ne’ebé ami-nia jerasaun, koñese família Jape Kong Su iha tempu portugés maibé ha’u gosta istória, gosta lee no rona istória, koñese Jape Kong Su nia família molok tempu japonés to’o sira-nia loja oan ida iha postu administrativu Maubara, ne’ebé ha’u koñese fa’an tua sabu iha ne’ebá, depois mai Dili tempu Japaun nian no sira mós iha Timór sofre. Avo Jape nia namorada (atuál espoza) momentu ne’ebá tinan 15 de’it kaben molok tempu Japaun tama,” Horta konta tuir.

Notísia relevante: Família haloot ona Jape Kong Su iha Hera

Nia dehan, iha funu daruak mundiál ramata, Jape Kong Su hahú filafali serbisu hodi buka kontribui ba Timór, tanba halo loja iha Dili, negósiu kafé, to’o mai funu sivil, Jape ho nia família sira mós sofre. Alan Jape (oan mane hosi Jape) mak aguenta iha Timór tempu ne’ebá, hanesan timor-oan barak ho difikuldade iha tinan 1999 liu tiha mak Jape hanoin harii Timor Plaza.

“Ha’u ko’alia ho nia dalabarak loos momentu ne’ebá, momentu hasoru difikuldade, triste, problema oioin, hanesan problema rai no seguransa. Momentu ha’u partisipa lansamentu hatuur fatuk dahuluk ba Timor Plaza, agora to’o ona CB10, tantu ema ida hatudu nia timor-oan duni,” nia tenik.

Xefe Estadu dehan, maski Jape laiha ona maibé husik buat barak iha mundu no Timór, nia mehi barak realiza ona, maibé seluk nia oan no bei-oan sira sei kontinua.

Jape Kong Su moris iha postu administrativu Balibo, munisípiu Bobonaro, iha loron 01 outubru 1927 no hakotu-iis iha Austrália iha loron 26 setembru 2022, no ohin dadeer família transporta mate-isin mai Dili hodi haloot, iha Hera, postu administrativu Cristo Rei, munisípiu Dili.

Antes ne’e, Jape Group harii Timor Plaza hosi Dili Development no halo lansamentu iha fulan-outubru 2011, ne’ebé kompostu hosi shopping mall, otél, eskritóriu, entertainment center, fatin jinástiku no seluk tan inklui halo konstrusaun iha fatin seluk ne’ebé kontribui ba dezenvolvimentu hanesan edifísiu postu administrativu Maubarak ho kustu $195.000.

Família husu kontribuisaun povu realiza Jape nia mehi

Iha biban hanesan, reprezentante família Jape Kong Su, Alan Jape, husu kontribuisaun povu no órgaun soberenu hodi realiza Jape nia mehi dezenvolve Timor-Leste.

“Iha serbisu boot ida ohin ba ami maun no alin, hamutuk ho ami-nia feton, tulun hosi autoridade, Governu no povu Timór, ami sei halo no realiza ninia vizaun, mehi ida-ne’e mak halo nia hili Hera sai hanesan nia fatin deskansa ba dala-ikus. Nia sei hateke tun mai ita katak, dezenvolvimentu turizmu iha Timór hahú hosi saida mak ita bele alkansa iha fatin ida ne’e,” oan mane Jape Kond Su, hato’o pedidu.

Alan Jape konta katak, nia-aman hadomi-nia serbisu no sempre hateten katak ninia gostu mak nia serbisu. Timor-Leste mak nia hadomi liu, nia serbisu maka’as atu hetan osan nune’e nia bele investe filafali ba projetu sira no halo dezenvolvimentu iha Timór.

“Iha tinan 2017, nia hahú projetu Hera ho idade 92, nia hakarak fatin ne’e atu sai resort ida ho nível mundiál no furak liu iha Timor-Leste. Nia loron-loron serbisu maka’as tebes, dala ruma nia mai uma kalan tuku hitu, bainhira ami husu nia tanba sá mak serbisu maka’as no serbisu iha oras barak nia laran, nia hatan: ha’u laiha ona tempu barak,” nia akresenta.

Nune’e, ohin nia husik ona ita ho nia mehi, hili ona fatin ne’e (Hera) atu dezenvolve sai hanesan sentru turizmu.

“Nia hakarak dezenvolvimentu ne’e atu sai susesu, nune’e iha ema barak no negósiu sei realiza importánsia hosi turizmu nian no partisipa iha indústria, nia fiar tebes katak turizmu sei lori empregu no moris di’ak ba ema barak, nia halo buat hirak ne’e la’ós ba nia-an mesak, nia halo ba nia rain,” Alan dehan.

Aleide ne’e, oan mane Jape fó mensajen katak, Jape ema ne’ebé serbisu maka’as no nia hakarak ema hotu atu serbisu maka’as, nia sempre dehan laiha buat ida maka gratuita iha mundu ida ne’e no nunka fiar iha jogu lotaria.

“Nia aiknanoik favoritu maka sé ema ida husu ikan ba o, o fó de’it mak kail ba nia, no hanorin nia oinsá atu hakail, nune’e nia mesak bele kail ikan barak liután,” Alan tenik.

Iha momoria ba Jape no atu kontinua nia eransa maka família sei lansa programa ida, ne’ebé sei tulun timor-oan, mane no feto atu hetan treinamentu vokasionál nune’e bele hetan serbisu no hetan moris di’ak.

“Ha’u hein katak ita hotu bele serbisu hamutuk atu realiza avo nia hakarak,” oan mane Jape espera.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!