DILI, 10 outubru 2022 (TATOLI)—Prezidente Autoridade Nasionál no Minerál (ANPM), Florentino Mateus Soares Ferreira, husu empreza Timor Resources atu hala’o serbisu tuir de’it kontratu ne’ebé selebra ona molok realiza planu seluk.
“Halo lai saida mak Timor Resource presiza atu halo tuir Production Sharing Contract (PSC), ne’ebé ANPM atribui ba sira molok sira ko’alia buat sira ne’e, tanba buat lubuk ida seidauk kumpre hotu. Sira lalika ko’alia buat ne’ebé sira seidauk bele halo tanba lisensa kontratu seidauk to’o faze ida appraise, sira seidauk halo deklarasaun komersiál mai ami, tanba ne’e sira seidauk kumpre kontratu tanba presiza halo lai mak foin avansa,” Prezidente ANPM hateten hafoin partisipa iha audénsia públika Orsamentu Jerál Estadu (OJE) 2023 ho kKomisaun D ne’ebé trata asuntu ekonomia no dezenvolvimentu iha rezidénsia ofisiál Prezidente Parlamentu Nasionál, iha Farol, segunda ne’e.
Notísia relevante: Empreza Timor Resources sujere Governu autoriza harii fábrika mina iha Timor-Leste
Timor Resources foin lalais sujere ba Governu, iha futuru karik bele harii fábrika produsaun mina ne’ebé empreza daudaun halo hela perfurasaun iha Timor-Leste no la presiza lori ba prodús iha Austrália ho razaun ida katak bainhira harii fábrika ne’e bele fó oportunidadade emprega joven timor-oan sira.
Ligadu ho planu ne’e, responsável ANPM dehan, nia parte apoiu kualker dezenvolvimentu no investment di’ak, enkuantu empreza iha osan barak halo investe maibé sira iha posu balun atu fura maibé seidauk realiza.
Enkuantu, ANPM to’o agora seidauk simu informasaun ofisiál hosi Timor Resources kona-ba rezultadu perfurasaun mina iha postu Liurai, munisípiu Covalima.
“Ami seidauk simu informasaun ofisiál tanba sira-nia planu ne’e atu fura posu tolu maibé to’o agora ami seidauk simu. Ami hein hela hosi sira, bainhira sira fó tiha mai mak foin bele avansa, normalmente ita iha deklarasaun komersiál depois ba iha konseitu dezenvolvimentu, aprova tiha konseitu dezenvolvimentu ne’e mak tama planu dezenvolvimentu,” nia esplika.
Nune’e, bainhira planu dezenvolvimentu aprova ona mak empreza foin bele prodús.
“Prosesu sei naruk, sira tenke halo teste lai, tanba sira seidauk halo teste ba parte tékniku sira hotu, bainhira halo hotu mak foin bele mai deklara. Timor Resource presiza hato’o sasán sira ne’e mai ami,” nia tenik.
Jornalista : Antónia Gusmão
Editora : Julia Chatarina
