MS-KFP lansa primeiru progresaun eskalaun profisionál saúde
DILI, 10 outubru 2022 (TATOLI)— Ministra Saúde, Odete Maria Freitas Belo ho Vise-Ministru Saúde, Bonifácio Mau Coli dos Reis akompaña hosi Prezidente Comisaun Funsaun Publika, Faustino Cardoso, segunda ne’e, hala’o lansamentu dahuluk Progressaun Eskalaun Profesionál Saúde iha Timor-Leste.
MS servisu hamutuk ho KFP no halo lansamentu dahuluk Progressaun Eskalaun ba Profesionál Saúde ba Médiku, Enfermeiru, Parteira no Tékniku Aliadu, hanesan direitu ne’ebé hatu’ur ona iha dekretu-lei númeru 13/2012 kona-ba Rejime kareira Profisionál Saude.
“Ami hamutuk ho Komisaun Funsaun Publika halo lansamentu ba rezultadu progresaun karreira profisionál saúde tanba tinan 10 ona, ami sira ne’ebé mak goja rejime espesiál durante ne’e seidauk iha prosesu ida, oinsá ami iha progresaun ka avaliasaun dezempeñu nian,” hateten Ministra Saúde Odete Maria Freiats Belo, iha salaun Palásiu Sinzas-Caicoli, segunda ne’e.
Tuir loloos, nia dehan profisionál saúde ne’ebé mak hetan dezempe`nu muito bom dala tolu tuir malu nia iha direitu atu sa’e nia eskalaun ho direitu atu hetan subsídiu ka remunerasaun ba nia.
“Maibé atulmente ida ne’e seidauk akontese, tanba ne’e mak ohin ita halo lansamentu ne’e hodi kria sistema atubele deteta sira nia dezempeñu, nune’e progressaun Eskalaun ba Profesionál Saúde ne’e nu’udar imi-nia direitu hanesan Profesionál Saúde”, katak.
Tanba Programa VIll Governu Konstitusionál, Repúblika Demokrátika Timor-Leste nian iha área saúde asunta pilar importante 7 maka hanesan: Governsaun ka Jestaun ba setor Saúde; Prestasaun ba Kuidadu Saúde Primáriu no Saúde Ospitalár, Servisu Suporta ba Prestasaun Saúde, hanesan área Farmásia no Ai-moruk, Laboratóriu no Ekipamentu Médiku atu halo diagnóstiku, terapia ka reabilitasaun, Rekursu Umanu Setór Saúde; Transporte Operasionál no Ambulánsia; Infraestrutura iha Setor Saúde no Finansiamentu Sistema Nasional Saúde.
Atu implementa programa sira-ne’e hotu pilar importante maka presiza Rekursu Umanu ida ne’ebé profisionál, apropriadu, adekuadu ho matenek no espíritu matenek nu’udar badaen na’in ba saúde hodi implementa atividade ministériu saúde ne’ebé hatur ona iha Planu Estratéjiku Nasionál Setór Saúde (PENSS) 2020-2030.
“Ami nota katak profisionál saúde lubuk ida mak presiza atu kompleta sira nia dokumentu avaliasaun dezempeñu, hosi prosesu sira ne’ebé mak ita halo ba profisionál saúde hamutuk 300-resin mak presiza kompleta sira nia dokumentu. Felismente ita iha 1.800-resin mak goja hela sira nia rejime espesiál sira elijivel atubele hetan sira nia subsídiu tuir eskalaun ne’ebé mak hosi tinan 2012 mai to’o 2016,” nia afirma.
Tuir lei katak hosi 1.800 ne’e la’ós dehan pasa hotu, maibé tenke foti um tersu hosi 1.800 signifika ema 624 mak sei simu uluk sira nia osan oituan ne’ebé mak liga ho eskalaun ka dezempeñu ne’ebé di’ak.
“Ha’u husu ba ita bo’ot sira hotu ne’ebé loron ba loron kontinua hala’o kna’ar tenke ho responsabilidade hodi hataan ba saúde, populasaun sira nian iha postu saúde, sentru saúde, hospitál no servisu autonómu sira hotu,” nia afirma.
Nune’e, nia husu ba profisionál saúde halo servisu no kontinua fó asisténsia saúde ne’ebé di’ak ho loloos ho espiritu profisionalizmu no responsabilidade.
Totál profisionál saúde ne’ebé sai hanesan funsionariu permanente hamutuk 4.184 no rejime espesiál ne’ebé hala’o kna’ar iha postu saúde hamutuk 858, sentru saúde 1.378, servisu ospitál 1.140, nune’e prodisionál saúde seluk ne’e hala’o kna’ar iha laboratóriu
Iha fatin hanesan, Prezidente Komisaun Funsaun Publika Faustino Cardoso, akresenta Komisaun Funsaun Públika ho Ministériu Saúde realiza dahuluk ho istória progresaun ba profisionál saúde durante tinan 10 nia laran goja rejime espesiál, maibé seidauk iha prosesu ida atu avalia dezempeñu ba sira.
“Ohin, ne’e rezultadu istóriku tebes prosesu ida ne’ebé que mai hosi servisu hamutuk entre KFP ho MS, maibé KFP nia kna’ar atu haree ba sistema katak oinsá mak tama sai iha elijivél no prienxe kritéru sira, tanba iha dekretu-lei ne’e minimu tinan tolu,”Nia informa.
Jornalista : Felicidade Ximenes
Editór : Florencio Miranda Ximenes
