Top

Kazu Constancio Pinto, arguidu José Deolindo deklara fó koñesimentu kona-ba proposta

Eis Ministru Komérsiu Indústria no Ambiente (MCI-Sigla Portugés), Constancio Pinto, sai hosi Tribunal Distrital Dili (TDD), kuarta (12/10). Imajen Tatoli/Francisco Sony

DILI,12 outubru 2022 (TATOLI)— Arguidu José Deolindo Ximenes, nu’udar Diretór Kompañia Star Product Unip.Lda, deklara ba tribunál katak molok halo proposta kona-ba projetu akizasaun mákina produsaun resiklajen, fó koñesimentu uluk no direta ba arguidu Constancio Pinto, eis Ministru Komérsiu, Indústria no Ambiente (MCIA, sigla portugés) no eis Diretór Jerál, Indústria no Kooperativa, António da Costa.

“Ha’u hatama duni ha’u nia proposta ba MCIA iha tinan 2016. Iha momentu ne’ebá antes hatama proposta ha’u ba ko’alia uluk ho Ministru Komérsiu, Indústria no Ambiente, Constancio Pinto (Eis Ministru MCIA) no Diretór Jerál, Indústria no Kooperativa, António da Costa (eis-DJ)”, arguidu haktuir iha sala julgamentu Tribunál Distritál Dili (TDD), kuarta ne’e.

Notísia relevante:  Constancio Pinto sai arguidu ba kazu partisipasaun ekonómika

Ministériu Públiku akuza arguidu José Deolindo, nu’udar na’in ba kompañia Star Product Unipessoál Lda ho krime partisipasaun ekonómiku iha negósiu

Perante audénsia julgamentu, arguidu José Deolindo dehan faktu ne’ebé deskreve iha akuzasaun balun loos no balun la-loos.

Tanba, nia dehan razaun hatama pedidu ka proposta ba iha MCIA tanba kompañia hakarak sosa mákina resiklajen ba lixu-nian, maibe laiha fundu ka osan atu halo akizasaun ba mákina refere.

Nune’e, nia esplika ba dahuluk buka informasaun iha Sekretáriu Estadu Formasaun Profisionál no Empregu (SEFOPE), atu hatama proposta atubele tulun fundu ruma hodi dezenvolve di’ak liu tan kompañia nia-atividade iha produsaun resiklajen-nian.

“Momentu ne’ebá, ha’u hatama duni proposta ba SEFOPE hodi husu fundu atu sosa mákina resiklajen, maibé SEFOPE la disponivél atu apoia fundu  tanba ho montante bo’ot,” arguido José Deolindo akresenta.

Iha tinan 2016,  arguidu afirma hatama fali proposta ba MCIA hodi husu fundu, nune’e proposta ne’e hetan aprovasaun no iha ekipa ida ba halo verifikasaun  no haree atividade kompañia nian.

Hataan kona-ba prosesu konkursu, arguidu dehan laiha koñesementu tanba desizaun tomak iha MCIA nia liman no sei la fó osan tanba iha hela kontratu ho MCIA iha momentu ne’ebá.

“Osan ne’ebé MCIA fó apoia ba ha’u-nia kompañia ne’e simu iha faze dala tolu no osan sira ne’e uza ba sosa mákina, ne’ebé sasan hirak ne’ebé junta iha proposta ne’e, ha’u mós hatama ona relatóriu tanba sasan ka mákina balun sosa duni,” afirma.

Hafoin rona deklarasaun ne’e, tribunál adia julgamentu ba loron kuarta-feira, 9 novembru 2022, tuku 9:00, dader hodi rona tan arguidu eis-ministru, Constáncio Pinto.

Julgamentu ne’e preside husi juiz Alvaro Maria, José Gonsalves, Argentino Nunes, Ministériu Públiku (MP) reprezenta Prokuradora Lidia Soares, arguidu sira hetan asisténsia legál hosi defensór públiku no advogadu privadu .

Notísia relevante:  Kazu Constancio Pinto, arguidu eis-DJ deklara iha koñesimentu kona-ba proposta

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!