iklan

HEADLINE, MUNISÍPIU, VIQUEQUE

SEII kontinua valoriza feto rurál partisipa iha prosesu dezenvolvimentu

SEII kontinua valoriza feto rurál partisipa iha prosesu dezenvolvimentu

Sekretária Estadu Igualdade no Inkluzaun, Maria do Rosário Fátima Correia, haree produtu feto rurál Uatucarbau, iha ámbitu komemorasaun loron internasionál feto rurál, iha postu Uatucarbau, kinta (13/10). Imajen Tatoli/Vitorino Lopes da Costa

VIQUEQUE, 13 outubru 2022 (TATOLI)—Sekretária Estadu Igualdade no Inkluzaun (SEII), Maria do Rosário Fatima Correia, komprometidu kontinua valoriza feto rurál hodi partisipa iha prosesu dezenvolvimentu.

“Ami sei kontinua fó espasu ba ema hotu hodi fó valorizasaun ba asuntu feto inklui feto rurál hodi partisipa iha prosesu dezenvolvimentu sira iha Timor Leste. Knaar ne’ebé ha’u asume sei luta ba igualdade jéneru no ohin ita mai komemora loron feto potensiál iha postu Uatucarbau,” Sekretária Estadu Igualdade no Inkluzaun, hato’o liuhosi ninia diskursu iha ámbitu komemorasaun feto rurál, iha postu Uatucarbau, kinta ne’e.

Governu liuhosi SEI deside komemora loron internasionál feto rurál ne’ebé kada tinan monu iha loron 15 outubru, iha postu Uatucarbau tanba poténsia ba setór agrikultór.

Serimónia komemorasaun loron internasionál ne’e ho atividade espozisaun no sertame ba estudante sira iha postu Uatucarbau.

Notísia relevante: SEII prevee millaun 2-resin iha proposta OJE 2023

SEII hala’o ninia knaar importante ba selebrasaun ne’e hamutuk ho komunidade, ho tema ‘promove cadeia de valór hodi asegura produtu feto rurál ba sustentablidade ekonomia família.’

“Komemorasaun loron ne’e importante tebes ba feto rurál sira. Oportunidade sira ne’e hanesan momentu furak hodi fanu feto rurál bele fó hanoin ba malu hodi harii sosiedade ne’ebé fó espasu ba feto nia partisipasaun. Feto nia partisipasaun la’ós foin agora maibé desde tempu uluk,” nia akresenta.

Tanba ne’e, SEII nafatin luta ba feto nia diretu atu redús viólensia hasoru feto ne’ebé akontese iha Timor-Leste.

“Esforsu sira-ne’e la’ós fasil, maibé ita presiza rona malu hahú hosi baze suku hodi foti responsablidade. Feto barak mak moris iha área rurál bele kontribui ba ekonomia. Dala ruma ema ladún tau importánsia ba feto, tanba ne’e ha’u hakarak asegura kona-ba foto nia papél no responsablidade. Apoiu hosi Governu liuhosi SEII mak orsamentu ba grupu feto kreativu sira,” nia tenik.

Iha fatin hanesan, Administradór postu Uatucarbau, Alfredo dos Santos, agradese ba SEII ne’ebé fó fiar ba postu hodi komemora loron internasionál feto rurál.

“Ha’u enkoraja feto sira labele lakon ho mane sira hodi partisipa iha prosesu dezenvolvimentu,” nia fó hanoin.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!