MP alega prizaun preventiva ba arguidu kazu Set-Top Box

DILI, 15 outobru 2022 (TATOLI)-Tribunál Distritál Dili (TDD), sábadu ne’e, halo ona interrogatóriu dahuluk ba kazu arguidu GPdD no MfC ne’ebé deskonfia envolve iha kazu Set-Top Box.
Perante interogatoriu dahuluk iha TDD, Ministériu Públiku (MP) ne’ebé maka reprezenta hosi Matias Soares husu ba tribunál atu aplika medida koasaun prizaun preventiva, ba arguidu na’in-rua, tanba haree ba faktu no prova sira, komprova duni katak arguidu na’in-rua maka nu’udar autór ne’ebé envolve direita ba kazu ne’e.
Ho nune’e, haree ba razaun hirak-ne’e maka Ministériu Públiku husu ba tribunál atu aplika medida koasaun prizaun preventiva tanba atu asegura arguidu sira labele halo lakon faktu no prova sira, bazea ba artigu 183 hosi Kódigu Penál Timor-Leste nian.
Razaun seluk ne’ebé maka MP fundamenta iha alegasaun ne’e maka atubele asegura arguidu sira labele desvia hosi prosesu justisa, tanba kazu ne’e seidauk iha finalidade.
Nuneei, parte Defeza hosi arguidu sira, Advogadu Privadu Arlindo Sanches, kontra alegasaun hosi MP no husu ba tribunál atu aplika medida ne’ebé adekuadu ba nia kliente.
“Iha alegasaun ne’e ami husu tribunál atu labele aplika prizaun preventiva ba ami-nia kliente, sé juiz hanoin seluk ba ami-nia kliente bele aplika medida koasaun adekuadu ba kliente sira,” Advogadu Privadu, Arlindo Sanches ko’alia iha TDD, sábadu ne’e.
Hafoin rona tiha parte sira, Tribunál adia interrogatóriu dahuluk nee ba loron-domingu, 16 fulan-outubru, tuku 12:00 lokraik.
Prosesu interrogatóriu dahuluk ne’e, prezide hosi Juiza Albertina Neves, Ministeriu Públiku reprezenta hosi Prokuradór Matias Soares no arguidu sira hetan asisténsia legál hosi Advogadu Privadu Arlinodo Sanches no Advogada na’in-rua.
Notísia relevante: Kazu Set-Top Box, arguidu na’in-rua submete interrogatóriu dahuluk
Jornalista: Natalino Costa
Editór: Evaristo Soares Martins

