Família agradese ba entidade hotu apoia seremónia funebre Jape Kong Su

DILI, 16 outubru 2022 (TATOLI)- Família husi Matebian Jape Kong Su agradese ba entidade Estadu hotu no ema hotu ne’ebé bele fó ona apoia másimu ba prosesu funebre matebian na’in ba Timor Plaza, Jape Kong Su iha Hera, postu administrative Cristo Rei, Munisípiu Dili, iha 6 outubru.
“Ita organiza han kalan ne’e espesiálmente atu fó agradesimentu ba ema hotu nian suporta tomak no fó asisténsia durante momentu difisil ba ami nia família hasoru, maibé ita boot sira tenta hodi esforsa-an apoia ami iha serémonia funebre la’o ho di’ak. Ami mós agradese ba ita bo’ot sira nia mensajen murak, simpatia no orasaun,” Oan Mane hosi matebian Jape Kong Su, Alan Jape, hateten iha ámbitu han kalan hamutuk ho entidade hotu, iha Timor Plaza-Dili, domingu ne’e.
Notísia relevante: Família haloot ona Jape Kong Su iha Hera

Família mós agradese ba Governu Timor-Leste tanba apoia tebes ba prosesu funebre nia aman nia hodi bele la’o di’ak, hahú hosi fornese karru funebre hahú iha aeroportu nian, ne’ebé Migrasaun, AA-Alfandega no polísia hodi fó akompañamentu ba prosesu to’o iha rate hodi haloot mate isin.
“Ami sente ordradu tebes tanba lideransa nasaun nia hanesan Prezidente Repúblika, Primeiru Ministru, Prezidente Parlamentu Nasionál marka presenza hodi asiste seremonia funebre mate isin ami nia apa nia”, Alan Jape kongratula.
“Ami hakarak hato’o obrigadu wa’in ba staff no voluntária sira hotu ne’ebé halo ona serbisu maka’as atu realiza buat hotu la’o ho di’ak. Nune’e mós ba ekipa serbisu loron no kalan halo preparasaun iha Fatumanu ne’e enkredivél tebes tanba ho tempu ne’ebé limitadu, balun halo serbisu to’o kalan no konsege finaliza tuir tempu ne’ebé limitadu”.
Famíla mós kongratula ba hirak ne’ebé organiza vizilánsia iha Timor-Plaza, sira ne’ebé organiza misa iha Igreja , sira ne’ebé halo ligasaun ho Governu, vendedór no fornesodór sira no Organizasaun Individu sira hanesan kompañia Pax, Burger King, RMS, Orden de Malta.
“Kongutula mós ba Midia sira hanesan Tve, Media Timor, Business Timor, Timor Post, Tatoli ne’ebé divulga ona informasaun sira kona-ba seremonia funebre Jape Kong Su nian. Se laiha ita bo’ot sira ami labele halo buat hirak ne’e ho di’ak,” katak.
Alende ne’e, Alan Jape mós agradese ba Kathleen Gonsalves ho nia ekipa Padre Madre no Koru sira ba ema hotu ne’ebé tulun fó sira nia votu orasaun.
“Avo orgullu tebes katak ita hotu serbisu ho di’ak iha nia jornada ikus liu. Agora ita hotu fila fali ba routina, ha’u hakarak fó hanoin ba ema hotu atu kontinua serbisu ho dilijénsia. Ita tenke kontinua avo nia obra no esforsu-an atu realiza mehi hirak ne’e, ita tenke serbisu hamutuk atu dezenvolve ita nian kompañia di’ak liután, nune’e di’ak ba rai ida ne’e,” nia afirma.
Notísia relevante: PR husu família Jape hamutuk ho Governu dezenvolve ekonomia Timor-Leste
Jornalista: Natalino Costa
Editór : Florencio Miranda Ximenes

