Ró ambulánsia transporta ona pasiente 79 hosi Ataúro mai Dili
DILI, 17 outubru 2022 (TATOLI)—Diretór Servisu Nasionál Ambulánsia no Emerjénsia Médika, Institutu Públiku (SNAEM.IP), Horacio da Costa informa hahú hosi janeiru to’o setembru, ró ambulánsia konsege transporta ona pasiente na’in-79 hosi Ataúro mai Hospitál Nasionál Guido Valadares (HNGV) hodi halo tratamentu saúde.
“Durante, Ita tansporta moras hosi Ataúro mai HNGV maioria kazu dengue no balun infensaun vias respiratóriu no mós inan isin rua-sira ne’ebé mak komplikasaun atubele hetan atedimentu médiku hosi espesialista sira,” hateten Diretór SNAEM.IP, ba Agência TATOLI, via telefónika, segunda ne’e.
Ró ambulánsia ne’e bainhira halo operasaun depende ba kazu ne’ebé mak iha, liuliu bainhira médiku sira iha Ataúro labele halo ona tratamentu saúde, mak foin bá evakua mai iha HNGV.
Ró ne’e oferese hosi Governu Indonézia ba Ministériu Saúde ho objetivu atu asegura no transporta pasiente via martima.
Ró ambulánsia ne’e halo iha Surabaya Indonézia hosi PT fiberboat no sosa ho osan montante $200.000, ne’ebé ho kapasidade tula pasiente 25 ho velosidade ne’ebé mak aas liu.
Jornalista : Felicidade Ximenes
Editór : Florencio Miranda Ximenes
