Klubu 15 sei kompete iha jogu Oe-Leu cup époka 2022

BOBONARO, 18 outubru 2022 (TATOLI) – Klibur Estudante Juventude Oe-Eleu (KEJO), rejista ona klubu hamutuk 15 mak preparadu atu kompete iha jogu amizade Oe-Leu Cup ba dala-X iha époka 2022.

Tuir oráriu kampeonatu ne’e hahú hosi loron-kuarta, 19 setembru 2022, tuku 09:00 sei abertura iha kampu Oe-eleu, postu administrativu  Bobonaro, munisípiu Bobonaro.

Klubu 15 ne’e fahe ona ba Grupu (A) mak hanesan,Buigali, HGS, Laktil no Vetaranu hosi Grupu (B) Unidus, Amandes, Mologen no Walgomo.

Enkuantu Grupu (C) Sibuni, Wepho, N2BK, X-Korta, Grupu (D) mak hanesan Marobo, Gumer no Loysagál.

Konselleiru KEJO, Alvaro do Rego, esplika klubu hirak-ne’e 15 mai hosi suku sira pertense ba postu administrativu Bobonaro no klube N2BK de’it mak hosi postu administrativu Maliana.

Notísia relevante: Klubu Sose Mucu kampiaun Oe-leu Cup époka 2021

“Ita sei konvida, autoridade lokál no autoridade seguransa,no lia-na’in sira, liuliu intelektuál suku Oe-Leu nian inklui mós suku sira seluk, tanba ne’e husu ba jogadór sira atu hatudu jogu ne’ebé di’ak, disiplina ba regra sira, atu imi bele sai jogadór ne’ebé di’ak,” nia informa ba Agência Tatoli, iha Oe-Leu, tersa ne’e.

Alvaro esklarese,  KEJO realiza jogu  ne’e kada tinan atu komemora loron masakre Santa Cruz 12 Novembru 1999, hodi hanoin hikas eroi joventude loriku as’wain sira-ne’ebé sakrifika sira-nia vida ba prosesu luta ba libertasaun nasionál.

Nia haklaken, jogu ne’e inisiativa mai hosi joven suku Oe-Leu rasik, ne’ebé hetan apoia fundu hosi Oeleu-oan sira ne’ebé serbisu hanesan traballadór iha Australia, no osan balun rekolla liuhosi rejistu klubu.

“Ami hanesan joven lakohi área desportu pasivu iha ami-nia suku no postu, ami hanesan prepara de’it jogadór sira, maibé atu buka fini di’ak ba munisípiu ne’e kompeténsia iha asosiasaun futeból munisípiu no Sekretaria Estadu Juventude no Desportu nia,” Alvaro hatutan.

Nia rekomenda ba Asosiasaun Futébol Munisípiu Bobonaro (AFB) no Sekretaria Estadu Juventude no Desportu liuhosi Federasaun Futeból Timor-Leste (FFTL) atubele hala’o selesaun ba jogadór sira-ne’ebé kada tinan sempre partisipa iha jogu ne’e.

Nune’e bele reprezenta munisípiu ba kompete iha nasionál,no karik iha prestasaun di’ak posiblidade bele reforsa ekipa lafaek selesaun nasionál ba kompete iha internasionál.

“Pontu fokál sira-ne’ebé sira prodús iha postu, ita labele sik no observa de’it, maibé se bele halo produsaun jogadór ne’e labele iha de’it kapitál nasaun, presiza mós avalisaun iha suku to’o aldeia sira, nune’e jogadór sira bele hatene Governu halo nia serbisu to’o baze atubele hetan jogadór di’ak,” nia fó hanoin.

Notísia relevante: AFB sei abertura jogu futeból sub-23

Jornalista   : Sérgio da Cruz

Editór         : Evaristo Soares Martins