Ministru Fidelis simu vizita kortezia husi responsável rejionál PNUD
DILI, 18 outubru 2022 (TATOLI)– Ministru Prezidénsia Konsellu Ministrus, Fidelis Manuel Leite Magalhães, tersa ne’e, simu vizita kortezia hosi Sekretária-Jerál Adjunta Nasaun Unida nian no Diretora Gabinete Rejionál Ázia no Pasífiku hosi Programa Nasaun Unida ba Dezenvolvimentu (PNUD), Kanni Wignaraja.
Reprezentante PNUD iha Timor-Leste, Tuya Altangerel, mós partisipa iha enkontru ida-ne’e. Durante sorumutuk ne’e, Ministru no Sekretária-Jerál Adjunta Nasaun Unida nian hala’o diskusaun kona-ba apoiu no kontribuisaun PNUD nian ba dezenvolvimentu Timor-Leste aliña ho prioridade Governu nian.
Asuntu prinsipál mak ko’alia iha enkontru ida-ne’e mak prosesu reforma administrasaun públika, ne’ebé lidera hosi Ministru Fidelis Magalhães.
Biban ne’e, Sekretária-Jerál Adjunta Nasaun Unida, Kanni Wignaraja, manifesta vontade PNUD nian atu fó apoiu iha prosesu ida-ne’e, liuliu iha reforsu institusionál, iha implementasaun sistema identidade úniku (IDU — ID Úniku) no servisu úniku ba atendimentu públiku (“one-stop-shop”).
“Ba oin ita sei iha kooperasaun ne’ebé di’ak no metin liután, ami prontu atu apoiu nafatin Timor – Leste iha área oin-oin hanesan Edukasaun no setór hotu ne’ebé importante,” katak.
Iha biban hanesan, Ministru Fidelis Magalhães, sente onra boot atu simu Kanni Wignaraja iha Timor-Leste no afirma katak durante ne’e parseria ho Nasaun Unidas nakonu ho rezultadu no hein katak sei kontinua metin kooperasaun ne’e, hodi hamutuk alkansa objetivu sira ne’ebé tanjível no pozitivu liu ba sidadaun sira.
“Ohin, ha’u hasoru malu ho asistente Sekretáriu Jerál ONU nian ne’ebé tau matan ba kooperasaun bilaterál hotu ne’ebé iha ita nia rejiaun, iha hasoru malu ohin oportunidade di’ak ba ita atu fahe hanoin, nune’e iha Timor bele hametin liután lasu koperasaun di’ak ho ONU no Agência sira hotu iha Timor – Leste hanesan UNDP no seluk tan,” dehan Ministru Fidelis iha Palásio Governo Dili.
Kooperasaun Timor-Leste ho ONU hahú 2002 to’o agora hatudu rezultadu ne’ebé pozitivu tebes no fi’ar katak iha future mai bele hametin liután relasaun Timor – Leste nian ho ONU.
Kanni Wignaraja hela iha Timor-Leste to’o loron 21 fulan-outubru, ne’ebé sei hala’o enkontru ho Primeiru-Ministru no membru VIII Governu Konstitusionál. Atividade sira ne’ebé prevee, inklui realizasaun sesaun diskusaun husi polítika sira kona-ba transformasaun ekonómika inkluziva pós-petróleu no vizita ba Rejiaun Administrativa Espesiál Oe-Cusse Ambeno (RAEOA).
Jornalista: Hortencio Sanchez
Editór : Florencio Miranda Ximenes
