MS hahú fahe ai-moruk lumbringa iha munisípiu tolu
DILI, 18 outubru 2022 (TATOLI)—Diretór Nasionál Saúde Publika iha Ministériu Saúde, Frederico Bosco informa Ministériu Saúde hahú fahe ona ai-moruk kombate lumbringa iha Munisípiu Dili, Manufahi no Lautem.
“Ita nia ekipa sira hahú fahe ona ai-moruk albendazole ba labarik sira ho tinan 6 to’o 14. Atividade ida ne’e la’o semana ida tomak, tanba iha tinan 2020-2021, lumbringa iha labarik sira nia kabun iha territoriu tomak, maibé iha munisípiu tolu mak labarik sira afeta maka’as ba ida ne’e,” Diretór Frederico Bosco informa ba TATOLI iha nia kna’ar fatin ohin.
Nia dehan, atividade ne’e atu kombate lumbriga iha labarik sira nia kabun ho kolaborasaun ho Ministériu Edukasaun Juventude no Desportu.
“Ita servisu hamutuk, liuliu professor partisipa iha atividade ne’e hodibele esplika ba estudante sira oinsá importansia atu konsumu ai-moruk lumbringa,” katak.
MS hakarak kombate lumbringa ne’e tanba iha ligasaun ho nutrisaun, anemia bainhira labarik sira hetan moras sira mak laiha konsentrasaun ba aprendijazen ho di’ak.
“Ita envolve profesor sira atu ativu iha atividade ne’e hodi hala’o ona programa saúde eskolar iha eskola ensinu Baziku no Ensinu Primaria,”Nia afirma.
Alende ne’e, Ministériu Saúde, halo peskiza no buka hatene prevalensia moras lumbringa ba labarik sira iha timor-laran tomak husi tinan 2020 too 2021, mak kuaze 17,9% mak sofre lubrimga, hosi ne’e Dili 24,1%, Aileu 18%, Liquiça 13%, Ermera,14%, Manatuto 29%, Manufahi 43%, Viqueque 17%, Baucau 19% ,Lautem 35%, Ainaro 14%, Bobonaro 9%, Covalima 0, Oe-cusse 3%, no Atauro 4%.
Jornalista : Felicidade Ximenes
Editór : Florencio Miranda Ximenes
