MS-USAID realiza semináriu validasaun deskrisaun no avaliasaun dezempeñu ba profisionál saúde
DILI, 19 outubru 2022 (TATOLI)— Vise-Ministru Saúde, Bonifácio Maucoli dos Reis, kuarta ne’e, halo abertura semináriu validasaun finál ba esbosu deskrisaun servisu no avaliasaun dezempeñu ba Profisionál.
Serimonia abertura semináriu ne’e akompaña husi Presidente Komisaun Funsaun Públika(CFP), Faustino Cardoso, Diretóra Interina Misaun USAID, Dinah Zeltser.
Ho apoiu tékniku hosi USAID, Ministériu Saúde prepara dokumentu importante rua ne’ebe aprezenta iha semináriu ne’e ho objetivu prinsipál maka atu hadi’a kualidade prestasaun kuidadu primáriu saúde ba populasaun tomak iha Timor-Leste.
Biban ne’e, Vise Ministru Mauocli dehan rekursu umanu nu’udar pilar xave ida ka nu’udar baze no fundasaun importante iha prosesu konstrusaun sistema saúde ne’ebé forte, efisiente efikási no sustentável.
“Ita labele hadia uma-laran no avansa ba oin, sem ita hadi’a uluk la’e ita-nia instrumentu jestaun rekursu umanu. Tinan ida-ne’e, ita bele konsidera hanesan tinan rekursu umanu ba setor saúde tanba ministériu saúde halo revisaun ba Dekretu-Lei kona-ba Ezersísu Profisionál Saúde no Dekretu-Lei Rejime Karreira Profisionál Saúde”, Vise Ministru hateten iha Otél Timor.
Mudansa importante ne’ebé MS halo relasiona ho exersísiu no karreira profisionál maka definisaun klaru kona-ba saída maka nu’udar profisionál saúde no bainhira konsidera katak profisionál saúde ezerse duni karreira hanesan profisionál saúde.
Nune’e mós enkuadramentu ba internatu profisionál nu’udar rekizitu importante hodi hetan sédula profisionál no tama iha karreira hanesan profisionál saúde.
MS dezenvolve Formatu Avaliasaun Dezempeñu hamutuk ho matadalan atu halo avaliasaun Dezempeñu bazéia ho área servisu no indikadór servisu ne’ebé Pesoál Saúde ida-idak halo, liga ho Pakote Kompreensivu ba Prestasaun KSP.
“Agora dadaun, ita fokus ba prosesu konsultasaun konaba deskrisun servisu profisional saúde sira, liu liu ba sira ne’ebé iha CHC no PS, hodi rona ita bo’ot nia hanoin no feedback ka imput atu haforsa diak liu tan dokumentu orientador ida-ne’e, hodi asegura katak investimentu ne’ebé Governu halo ho ita bo’ot nia rekrutamentu bele kontribui ba melhoramentu kualidade prestasaun saúde iha ita-nia komunidade”, katak.
Nune’e, semináriu ida ne’e oportunu tebes hodi rona representante hosi profisaun saúde idaidak relasiona ho ninia área funsionál no postu traballu iha fasilidade saúde.
Vise-Ministru mós agradese ba partisipante hotu ne’ebé marka prezensa iha semináriu ne’e ho objetivu komun hanesan hasai kualidade prestasaun kuidadu saúde iha Timor-Leste.
Ministériu Saúde apresia tebes USAID ne’ebé representa povu Amerikanu, ba apoiu hodi kontribui ba melloria governasaun sistema nasionál saúde liuhosi pilar importante hanesan rekursu umanu ho intensaun atu hadi’a kualidade.
Maucoli espera katak hafoin diskusaun, korresaun no validasaun proposta Deskrisaun Servisu no Modelu Avaliasaun Dezempeñu Profisional Saúde, Ministériu Saúde hamutuk ho Komisaun Funsaun Publika bele prepara proposta Dekretu Guverno ida ne’ebé regula avaliasaun Dezempeñu Profisional Saúde, bazéia ba Dekretu-Lei konaba Regime Karreira Espesiál ba Profisionál Saúde.
Iha fatin hanesan, Prezidente CFP, Faustino Cardoso informa Estadu la’o daudaun ona atu hametin administrasaun públika hodi hasa’e prestasaun servisu no hasa’e servisu iha entidade hotu inklui Ministériu -Saúde nian.
“Tinan 10 aplikasaun rejime profisionál senior, maibé ita koñese katak kontinua rejista lakunas, dalabarak bele indika ba iha jestaun responsabilidade, jestaun kualidade administrasaun,” katak Faustino Cardoso.
Hahú tinan 2022 to’o 2024, USAID apoiu fundu milliaun $15, 6 atu hametin Governasaun no finansiamentu iha setor saúde, hadi’ak rekursu umanus ba setor saúde, hadi’ak advokasia ba sosiedade sivil no promove komportamentu saudavél iha nivel uma kain no komunidade.
Jornalista : Felicidade Ximenes
Editór : Florencio Miranda Ximenes
