MEJD-SETP sei diskute indemnizasaun ho okupante resintu Eskola Bidau Akadiru-Hun
DILI, 21 outubru 2022 (TATOLI)— Ministériu Edukasaun Juventude no Desportu (MEJD) no Sekretária Estadu Terras no Propriedade (SETP), sei hala’o reuniaun ho okupante resintu Eskola Bázika Centrál Bidau Akadiru-Hun hodi diskute kona-ba montante indemnizasaun.
Okupante uma-kain ualu ne’ebé okupa fasilidade iha resintu Eskola Ensinu Báziku Sentrál (EBC, sigla portugés) Bidau Akadiru-hun, hetan ona notifikasaun hosi Sekretaria Estadu Terra no Propriedade (SETP) atu hamamuk ona arredór eskola iha loron-10 nia laran, hahú loron 20 to’o 30 setembru 2022.
“Ministru Justisa orienta atu ekipa Sekretária Estadu Terras no Propriedade atu koopera ho MEJD hodi realiza diálogu ho okupante sira atubele aloka orsamentu hodi solusiona kestaun ne’e,” informa Diretór ne’e ba Agência TATOLI iha Bebora, Díli.
Notísia relevante: Uma-kain ualu iha resintu Eskola EBC Bidau simu notifikasaun hosi SETP
Tuir nian nesessáriu duni atu okupante sira hamamuk arredór eskola sira hodi garante ambiente eskola, liuliu prosesu aprendijazen bele la’o di’ak.
Lucas António akresenta loos ne’e hasai ona família hirak ne’e ho baze ba lejislasaun, maibé Governu hakarak kria kondisaun no garante direitu sira-nia.
“Ita presiza halo tratamentu digñu ba sira, tanba ne’e ami sei komunika ho MEJD hodi haree tau fundu oituan ba kestaun ne’e, nune’e ita haruka ita nia sidadaun sira sai tenke sai ho digñu”.
Hosi família uma-kain ualu ne’ebé okupa arredór eskola, iha profesór na’in-ida de’it, seluk hanesan okupante uma-kain ho abitante 50 resin, ne’ebé okupa ona desde tempu krize polítiku.
Notifikasaun ne’ebé okupante sira simu, ninia tratamentu hanesan tantu ba profesór no abitante seluk tenke hamamuk arredór eskola, hafoin entrega hikas ba Governu liuhosi Ministériu Edukasaun Juventude no Deportu (MEJD).
Daudaun ne’e, iha munisípiu Dili iha eskola hamutuk 223, hosi númeru ne’e eskola 10 mak família na’in-53 okupa hela arredór eskola.
Notísia relevante: Uma-kain ualu iha arredór Eskola EBC Bidau Akadiru-hun prontu hamumuk fatin
MEJD la prevee indemnizasaun ba komunidade okupa fasilidade eskola
Jornalista : Jornalista: Natalino Costa
Editór : Florencio Miranda Ximenes
