UNDP-CI halo reflesaun ba programa PNUD iha TL
DILI, 21 outubru 2022 (TATOLI)—Adjuntu Administradór Programa Dezenvolvimentu Nasaun Unida (UNDP) no Diretor Dirasaun Rejionál ba Ázia no Pasífiku, Kanni Wignaraja hateten, ohin UNDP no Conselho de Imprensa (CI) organiza enkontru ho mídia Timor-Leste halo reflesaun kona-ba atividade no programa UNDP nian durante implementa iha Timor-Leste.
“UNDP nu’udar ajénsia dezenvolvimentu ida-ne’ebé iha programa barak hodi apoia dezenvolvimentu nasaun nian iha aspetu barak hanesan diversifikasaun ekonomia, emprezáriu, edukasaun, saúde, nutrisaun, justisa, mudansa klimátika, ekonómia verde no azúl, enerjia renovavél, agrikultura, boa-governasaun, demokrasia, justisa no sira seluk tan. Ida-ne’e mak ohin UNDP ho CI hamutuk ho mídia nasionál sira hodi halo reflesaun,” Kanni Wignaraja hateten liuhosi diskursu, iha Hotel Timor, Dili.
Programa hotu-hotu ne’ebé mak UNDP implementa iha Timor-Leste ne’e fó impaktu ba ema-nia moris-di’ak.
Prezidente Conselho de Imprensa (CI), Virgílio Guteres, hateten jornalista tenke kontinua enkoraja Governu atu aumenta orsamentu Estadu ba edukasaun ne’ebé bele asegura kualidade edukasaun iha Timor-Leste.
“Edukasaun no nutrisaun nu’udar programa ne’ebé labele haketak tanba labarik sira tenke konsume ai-han nutritivu sufisiente atu asegura dezenvolvimentu kakutak ba labarik ida ho idade tinan 5-10,” nia dehan.
Biban ne’e, Adjuntu Administradór husu jornalista Timor-Leste atu buka hatene totál osan ne’ebé kontribui ba impostu nian ne’ebé povu Timor serbisu ba hanesan iha Austrália no Repúblika Korea.
“Jornalista Timor-Leste tenke hatene montante impostu no Governu uza osan ba programa saida de’it, presiza hatene,” nia dehan.
Reprezentante Rezidente PNUD, Tuya Altangerel agradese ba eventu ida-ne’e tanba bele fahe sujestaun ho Diretór Rejionál PNUD no programa sira-ne’ebé mak implementa ona iha Timor-Leste no iha benefísia ba ema vulneravél sira.
Journalista : Osória Marques
Editór : Cancio Ximenes
