DILI, 25 outubru 2022 (TATOLI)— Xefe Missaun Organizasaun Internasionál Migrasaun (IOM) iha Timor-Leste Aishath Ihma Shareef, hateten sira nia parte prontu atu kolabora ho Governu Timor-Leste no Portugál hodi tulun timoroan sira ne’ebé infrenta hela problema ka “terus” hela iha Portugál.
“Ohin, ha’u mai ko’alia ho Primeiru Ministru atu haree oinsá buka dalan hodi ajuda timoroan sira iha Portugal ne’e,” dehan Aishath hafoin ramata sorumutuk ho Primeiru Ministru, Taur Matan Ruak iha Pálasiu Governu, tersa ne’e.
Notísia relevante: IOM hakarak repatria timor-oan ne’ebé “terus” hela iha Portugál
IOM hakarak apoia fíziku liuliu buka hela fatin ba Timoroan sira ne’ebé terus hela iha Portugál ne’e hela, sosa billete hodi sira fila ka halo repatriasaun inklui prontu apoia saida de’it ne’ebé timoroan sira presiza.
“Ami ajuda timoroan sira hanesan ami ajuda nasaun sira seluk, maibé asuntu seluk Governu rai rua mak bele ko’alia, ami so bele ajuda iha parte balun de’it”, katak.
Ho nune’e, Primeiru Ministru Taur Matan Ruak aseita kona-ba apoia fíziku ne’ebé IOM atu fó ba timoroan hirak ne’e.
TL ho Portugál sei buka solusaun
Ministra Negósiu Estranjeiru no Kooperasaun, Adaljiza Albertina Xavier Reis Magno, informa timoroan sira enfrenta hela problema iha Portugál tuir dadus ne’ebé MNEK iha kuaze na’in-5.000, maibé infrenta problema grave ou terus liu mak na’in-700 resin seluk ne’e iha ona kondisaun.
“Timoroan sira ne’e la hetan servisu, laiha osan hodi selu hela fatin no seluk tan, maibé Governu to’o agora buka meiu atu salva sira, ho nune’e mak iha semanan kotuk Governu aprova dekretu lei ida atu proteje sira”, katak Governante ne’e.
Daudaun ne’e, Timor-Leste ho Portugál mós tenta hela atu koopera ho Governu Timor -Leste hodi hamenus timoroan ne’ebé viájen bá tama Portugál la ho razaun klaru no laiha ema ruma fó garantia.
Alende ne’e, Ministra Adaljiza mós relata rezultadu vizita Prezidente Repúblika nian ba Kamboja foin lalais no preparasaun vizita Prezidente Repúblika nian atu bá Portugál.
“Liuliu atu haree kona-ba oinsá ita ho Portugál nia haree hamutuk buka solusaun ba ita nia maluk Timoroan sira terus hela iha ne’ebá”, katak.
Nia esplika, novidade di’ak ba Timor – Leste iha vizita ba Kamboja mak nasaun membru sira ko’alia ona oinsá atu deside TL hola parte hanesan membru ba ASEAN.
Tanba ne’e, Timor – Leste kontinua hein tan rezultadu iha tempu besik bainhira nasan membru sira deside.
“Kamboja sira hanesan nasaun ida ne’ebé apoiu ita maka’as loos, sira mak halo advokasia maka’as ho nasaun barak, sira mós mobiliza emprezáriu barak ajuda ita nia adezaun no seluk tan”.
Notísia relevante: PNTL no F-FDTL sei “trava” timoroan ne’ebé viájen bá diáspora liuhosi Ajénsia Ilegál
Jornalista: Hortencio Sanchez
Editór : Florencio Miranda Ximenes
