Top

Ekipa Konjunta “bandu” utilizasaun viatura Estadu iha loron finadu

FALINTIL-Forsa Defeza Timor-Leste (F-FDTL) no Polisia Nasional Timor-Leste (PNTL) hala'o operasaun konjunta, iha Becora Dili, sesta (09/09). Imajen Tatoli/Francisco Sony.

DILI, 27 outubru 2022 (TATOLI)— Ekipa konjunta, kompostu hosi Komisaun Anti-Korrupsaun (CAC,sigla Portugés), Polísia Nasionál Timor-Leste (PNTL), Diresaun Nasionál Transporte no Terrestre (DNTT) no Diresaun Nasional Patrimóniu Estadu  (DNPE), hasai sirkulár ida hodi “bandu” funsionáriu públiku no ajente administrasaun Estadu nian utiliza patrimóniu Estadu durante loron  finadu.

Pontu Vokál Komisaun Anti Korupsaun (CAC), Euclides Vidal Madeira, hateten Ekipa Fiskalizasaun Konjunta (EFK) sei la tolera sidadaun ne’ebé utiliza viátura Estadu iha loron bo’ot finadu.

“Ami sei halo kontrolu másimu ba utilizasaun viatura Estadu iha loron feriadu ba loron matebian nian hahú 31 outubru to’o 03 novembru.  Ami so autoriza de’it ba sira ne’ebé halo atividade ba fins profisionál ho karta autorizasaun hosi superiór, maibé seluk ne’ebé laiha karta autorizasaun sei prosesa tuir lei”,  dehan Euclides liuhosi konferensia imprensa ne’ebé halao iha Komandu Jeral Dili, kinta ne’e.

Tanba ne’e, nia husu ba responsavel lojístika no patrimóniu sira atu fó hatene ba utilizadór hotu atu kumpre avizu ne’ebé fó sai ona no utilizadór balun la kumpre hato’o kedan ba ekipa konjunta hodi halo intervensaun.

“Ekipa sei halo monitorizasaun ba utilizasaun ba karreta Estadu iha loron bo’ot semana oin, liu hosi halo vizita ba Ministériu ho meiu Check point no sweeping”, nia informa.

Ekipa Fiskalizadór halo ona koordenasaun ho PNTL liuhosi Diresaun Tránzitu Nasionál no Munisípiu hodi halo “check point” ba movimentu viatura Estadu nian iha munisípiu ida-idak no postu administrativu sira.  Nune’e bele identifika utilizadór viatura Estadu ne’ebé la kumpre saida mak fó sai ona nune’e bele prosesu tuir lei hodi responsavilidade administrativa, disipliar no kriminal.

Nune’e, nia husu ba sidadaun hotu atu apoia halo kontrolu másimu ba utilizasaun viatura Estadu durante loron finadu, karik identifika bele hasai fotográfia no video hodi lansa iha media sosiál no Fecebook atu bele halo presu ba utulizadór hirak ne’e.

Instituisaun ne’ebé hetan autorizasaun halo movimentu viatura Estadu mak hanesan, PNTL, FALINTIL-Forsa Defeza Timor – Leste (F-FDTL), servisu saúde, Bombeiru, servisu kuaretena Autoridade Aduaneiru-Alfandega, Ambulánsia no hirak ne’ebé ho karta autorizasaun hosi superiór hodi halo servisu iha tempu feriadu.

EFK halo serbisu bazea ba dekretu-lei númeru 21/2021, 10 novembru, kria subsídiu mensál ba transporte tuir rezolusaun Governu númeru 130/202, kona-ba jestaun no realokasaun veíkulu Estadu no padraun prosedimentu operasionál kona-ba realokasaun no utilizasaun veíkulu Estadu.

Tanba ne’e, kuandu iha operasaun polísia  identifika  veíkulu ne’ebé laiha autorizasaun sei halo abreviguasaun no investigasaun maka iha indísiu krime sei prosesa tuir lei.

Notísia relevante:PNTL sei halo pasa revista ba transporte privadu no Estadu iha loron finadu

Jornalista: Hortencio Sanchez

Editór      : Florencio Miranda Ximenes

Publisidade

Leave a Reply

Latest Post

error: Content is protected !!