PNTL sei halo pasa revista ba transporte privadu no Estadu iha loron finadu

DILI, 26 outubru 2022 (TATOLI)— Komandu Polísia Nasinonál Timor-Leste (PNTL), hatún ona orden ba komandante munisípiu no unidade sira hodi forma ekipa halo operasaun hodi kontrola movimentu transporte públiku no Estadu iha loron finadu.
Liuhosi konferénsia imprensa iha kuartél Jerál PNTL, Portavós Komandu Jerál Polisia Nasionál Timor-Leste (PNTL), Superintendente Xefe Arnaldo de Araújo, alerta ba transporte públiku atu labele tula pasajeiru sira liu kapasidade hodi hodi evita kazu asidente tráfegu.
“Husu ba ita nian motorista sira no karreta nain-sira atu labele tula pasajeiru sira liu kapasidade karreta nian hodi evita asidente trágefu”, hateten Portavós Komandu Jerál PNTL ne’e, kuarta ne’e.
Alende ne’e, Komandu PNTL mós husu ba funsionáriu ka ajente administrasaun públiku labele uza karreta Estadu hodi halo movimentu iha tempu finadu.
“Ami husu atu iha loron bo’ot ne’e karreta Estadu sira ne’e labele utiliza hodi lori bá foho. Tanba Governu hasai ona desizaun bandu karreta Estadu halo movimentu iha loron boot”, apela Arnaldo de Araújo.
PNTL halo operasaun mak identifika Karreta Estadu no karreta privadu liuliu bís tula pasajeiru liu kapasidade mak sei atu tuir lei ne’ebé vigora liuliu kódigu estrada.
Komandu PNTL mós husu ba sidadaun hotu liuliu joven sira atu labele hemu tua iha rate hodi garante pás no estabilidade iha loron finadu.
Jornalista: Natalino Costa
Editór : Florencio Miranda Ximenes

