Estoke ai-moruk tipu 41 “mamuk” iha Ospitál Referénsia Maubessi
DILI, 27 outubru 2022 (TATOLI)— Diretora Ezekutiva Hospitál Referénsia Maubessi, Gabriella da Conceição Magno Perreira, informa estoke ai-moruk ne’ebé simu husi Servisu Autonómu Medikamentu no Ekipamentu Saúde (SAMES) hamutuk tipu 200, hosi númeru tipu 41 mak mamuk ona.
“Estoke ai-moruk ne’ebé mak ita simu ne’e besik 200, maibé tipu 41 ka 15% mak mamuk ona iha ami nia fatin, maibé ami iha ai-moruk hanesan ne’ebé bele halo substituisaun,” Diretora Gabriella hateten ba Agência TATOLI via telefónika, kinta ne’e.
Aimoruk ne’ebé item mamuk mak hanesan permethrin lation 1%, genta coliro 0,3% claritromicine 200mg, Ergotamine caffein 10g, Boric acid 2%, clorohexidine 1%50gr, permethrin sampoo, calamin lation, SF syrup.
Nune’e mós ai-moruk Dexamethasone 4mgtab, furosemide tab, ibuprofen tab, acido folico (AF) 1mg tab, Diajepan infeksi, Buscopan infeksi, vito B6 Tab,propofol, no phenobarbital inj, no item sleuk tan.
“Aimoruk ba operasun nian liuliu ai-moruk vital ita sufisiente hela atu halo atendimentu ba moras komplikasaun sira ne’ebé mak iha,” katak.
Nune’e, Diretora ne’e afirma halo pedidu ba armazen rejionál Ainaro no SAMES nasionál atu halo distribuisaun, maibé seidauk iha resposta.
Daudaun ne’e, nia akresenta sala operasaun sei taka provizóriu tanba espesialista Kubanu fila ba sira nia rain, nune’e hein espesialista foun mai mak loke. Tanba ne’e karik iha kazu komplikasaun ruma atu halo operasaun sei halo transferensia ba iha Hospitál Nasionál Guido Valadares (HNGV).
Totál profisionál saúde kompostu hosi rejime jerál no rejime espesiál hamutuk 122, mak hala’o kna’ar iha Hospitál Referénsia Maubesi.
Jornalista : Felicidade Ximenes
Editór : Florencio Miranda Ximenes
