iklan

EKONOMIA, BOBONARO, HEADLINE, MUNISÍPIU

MAP apoia orsamentu $47,811 ba grupu 10 iha Ritabou implementa projetu HAPAS

MAP apoia orsamentu $47,811 ba grupu 10 iha Ritabou implementa projetu HAPAS

Sekretáriu Programa HAPAS iha munisípiu Bobonaro, Adérito dos Santos, entrega hela osan ba grupu benefisiáriu sira iha suku Ritabou, postu administrativu Maliana. Imajen Tatoli/Sérgio da Cruz.

BOBONARO, 27 outubru 2022 (TATOLI)-Ministeriu Agrikultura no Peska, kinta ne’e distribui orsamentu hamutuk $47,811 ba grupu benefisiáriu 10 iha suku Ritabou, postu administrativu Maliana, munisípiu Bobonaro hodi implementa Projetu Hasa’e produtividade Agrikultura Sustentável (HAPAS) faze dahuluk no daruak iha tinan 2022.

Sekretáriu Programa HAPAS iha Munisípiu Bobonaro, Adérito dos Santos, esplika orsamentu ne’e apoia bazea ba proposta hosi grupu benefisiáriu sira submete hodi implementa sira-nia atividade setór obrigatóriu florestál hanesan kuda ai produsaun no konservasaun, pekuaria mak hakiak manu, bibi, karau no fahi, setór peska nia mak hakiak ikan no setór ortikultura nian.

Notísia relevante: MAP halo avaliasaun HAPAS ba munisípiu neen

“Ohin, ami distribui osan hamutuk $47,811 ba grupu 10 iha Ritabou, kada grupu asesu ba iha fundu kiik ho montante $12.500, sira-nia atividade balu sira implementa ona, tanba sira simu ne’e balu primeiru faze no balu segundu faze tanba atribuisaun proposta la hanesan,” Adérito informa ba jornalista sira iha sede suku Ritabou.

Nia hatutan, orsamentu ne’e kada grupu sei halo jestaun rasik nune’e bele dezenvolve sira-nia atividade bazea ba proposta ne’ebé submete, maibé ministériu mos sei kontinua fó asisténsia téknika nune’e programa ne’e bele iha ninia sustentabilidade.

Sekretáriu HAPAS Bobonaro ne’e fundamenta, objetivu hosi distribuisaun fundu ne’e hodi hakbiit ekonomia família atubele  hadi’ak bee-matan hodi  kontribui konserva basia idrografia mota Loes.

“Ita atu konserva basia idorografia mais nee perigozu, entaun ita tenke fó ba atu habokur, ita la habarak tarjetu fulan-neen sira ba ona, entaun intensivu habokur paronisasi, ita mós fó asisténsia oinsá prepara ai-haan ba manu, fahi no karau sira-ne’ebé kesi,” nia katak.

MAP liu hosi sistema ‘Random’ identifika Suku Ritabou implementa programa HAPAS ho totál grupu 29 tanba hela besik mota Bulobu ninian, ne’ebé hela besik mota-Bulobu ninian nune’e prienxe menu indikativu ne’ebé estabelese.

Administradór postu administrativu Maliana, munisípiu Bobonaro, Tomás Lacu-Loe, agradese ba Ministériu Agrikultura no Peska tanba programa HAPAS bele tulun komunidade sira hadi’ak rendimentu uma-laran.

“Ha’u husu ba grupu sira tenke uza osan ne’e ho responsabilidade, hanoin katak osan ne’e ita-nia atu nune’e labele kotu de’it iha dalan klaran, atu nune’e tempu tuir mai grupu seluk bele hetan fali, labele para de’it iha sira-ne’ebé ke ohin hetan,”Administradór ne’e apela.

Xefe Grupu Kampu Aviasaun, Carlito Gonçalves, sente kontente tanba Governu kontinua apoia orsamentu ba sira-nia atividade.

Nia dehan, grupu kampu aviadaun iha atividade tolu; florestál, ortikultura no pekuária.

“Ami haree programa ida SAPIP ne’e mais di’ak ona, tanba sira ajuda no la fó fila fali ona, ami espera katak osan ne’e sei fó benifísiu di’ak mai ami, ami sei jere ho di’ak tanba ami iha esperiénsia tiha ona, ami nia modo mós bainbain ami fa’an,” nia akresenta.

Grupu benefisiáriu ba programa HAPAS iha munisípiu Bobonaro hamutuk 89 mai hosi postu administrativu Balibo, Cailaco no postu administrativu Maliana.

Entretantu, iha 16 novembru 2016 Governu Timor-Leste liuhosi Ministériu Agrikultura no Peska (MAP) selebra akordu ida ho Banku Mundiál hosi Nasaun Unida kona-ba implementasaun projetu Hasa’e Produtividade Agrikultura Sustentavél (HAPAS).

Projetu ne’e Ministériu Agrikultura no Peska (MAP) ho Banku Mundiál, hahú halo lansamentu iha 29 setembru 2017, munisípiu hitu (7) maka sai alvu iha implementasaun faze dahuluk, hanesan basia idrográfika Be-Lulik, realiza iha munisípiu Ainaro no Covalima, basia idrográfika Loes, realiza iha munisípiu Ermera no Bobonaro, basia idrográfika Raumoco, realiza iha munisípiu Lautem, no basia idrográfika Tono, realiza iha Rejiaun Administrativa Espesiál Oé-Cusse Ambeno (RAEOA).

Projetu ne’e implementa hosi Ministériu Agrikultura no Peskas (MAP) hetan finansiamentu fundu hosi Programa Seguransa Ai-han no Agrikultura ka Global Agriculture and Food Security Programme (GAFSP) ho montante hamutuk millaun $21.

Notísia relevante: MAP apoia grupu 37 iha RAEOA dezenvolve projetu HAPAS

Jornalista:Sérgio da Cruz

Editór:Evaristo Soares Martins

iklan
iklan

Leave a Reply

iklan
error: Content is protected !!