DILI,03 novembru 2022 (TATOLI)–Konstrusaun Uma Kbi’it La’ek (UKL) iha Suku Tekinomata, Postu Administrativu Laga Munisípiu Baucau, atinje ona 50%.
Xefe suku Tekinomata, Cipriano Arlindo Ximenes, hateten progresu UKL iha Suku Tekinomata la’o hela no atinje ona 50%.
“Ami nia suku Tekinomata, iha aldeia tolu, maibé iha benefisiáriu ema na’in sia mak hetan Uma Kbi’it La’ek”, hatete Xefe Suku Cipriano, ba Agência TATOLI via telefónika, kinta ne’e.
Nia dehan, kada aldeia ida hetan uma tolu hanesan aldeia Cacarai, Samaquia no Itidau.
“Iha tinan kotuk ita hetan uma tolu deit iha aldeia ida,maibé ba tinan 2022 hetan uma sia mak benifisiaria ba ida ne’e”.
UKL sia ne’e konstrui iha fulan setembru no sei ramata iha loron 30 novembru 2022.
Jornalista : Felicidade Ximenes
Editór : Florencio Miranda Ximenes
