iklan

NASIONÁL, HEADLINE, POLÍTIKA

PM Taur halo aprezentasaun polítika-lejizlativa kria estatutu pesoál SNI iha KM

PM Taur halo aprezentasaun polítika-lejizlativa kria estatutu pesoál SNI iha KM

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, sesta (04/11). Imajen Tatoli/Egas CristóvãoPrimeiru-Ministru, Taur Matan Ruak, prezide reuniaun Konsellu Ministru, iha Palásiu Governu, sesta (04/11). Imajen Tatoli/Egas Cristóvão

DILI, 04 novembru 2022 (TATOLI)–Primeiru-Ministru no Ministru Interiór, Taur Matan Ruak, halo aprezentasaun polítika-lejizlativa tolu ne’ebé sai hanesan baze ba inisiativa hodi kria estatutu pesoál hosi Servisu Nasionál Intelijénsia (SNI) iha reuniaun Konsellu Ministru (KM) estraordinária, sesta ne’e.

“Opsaun polítika-lejizlativa sira ne’ebé aprezenta ho objetivu atu fó estatutu pesoál ba SNI atu klarifika opsaun oioin kona-ba modalidade rekrutamentu rekursu umanu no hasa’e motivasaun pesoál liuhosi oportunidade dezenvolvimentu profisionál no mós iha nível remuneratóriu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Polítika-lejizlativa seluk maka seguransa nutrisionál no implikasaun sira iha dezenvolvimentu kognitivu labarik, aprezenta kauza no konsekuénsia prinsipál sira hosi má-nutrisaun iha dezenvolvimentu labarik sira no análize ida kona-ba medida sira ne’ebé realiza ona, nune’e mós rekomendasaun prioritária intervensaun.

Inisiativa ne’e sai hanesan baze atu kria unidade misaun nian hodi kombate hasoru nanizmu ka stunting.

Notísia relevante: SNI detein suspeitu na’in-lima “foti subar” motór iha kapitál Dili

Nanizmu ne’e relasiona ho dezenvolvimentu fíziku no kognitivu ne’ebé kiik indivíduu ne’ebé maka hasoru situasaun má-nutrisaun durante tempu naruk. Konsekuénsia nanizmu ka stunting ne’e sei sente durante moris tomak indivíduu, tantu iha ninia saúde no mós kona-ba ninia kapasidade atu tama iha merkadu serbisu.

“Prevee kriasaun ba unidade misaun ida atu kombate hasoru stunting, ne’ebé sei depende ba Primeiru-Ministru, tanba natureza multidixiplinár no plurisetorál hosi asaun sira ne’ebé mak tenke hala’o. Unidade ida-ne’e sei sai nu’udar responsável atu elabora planu asaun ida kona-ba kombate hasoru stunting iha Timor-Leste, no mós ba ezekusaun medida sira ne’ebé prevee tiha onam,” nia tenik.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!