iklan

EDUKASAUN, HEADLINE

MEJD orienta ona reabilita morru protesaun iha eskola ESTV Hera

MEJD orienta ona reabilita morru protesaun iha eskola ESTV Hera

Ministru Edukasaun Juventude no Desportu, Armindo Maia. Imajen Tatoli/Francisco Sony

DILI, 07 novembru 2022 (TATOLI)–Ministru Edukasaun Juventude no Desportu (MEJD), Armindo Maia, orienta ona Diresaun Nasionál Dezenvolvimentu Parke Eskolár (DNDPE) ho urjente atu reabilita morru protesaun iha Eskola Ensinu Sekundáriu Tékniku Vokasionál (ESTV) Hera.

“Ha’u orienta ona tékniku sira atubele halo morru protesaun temporáriu ida atubele ultrapasa tempu udan iha fulan-tolu ne’ebé perigu ne’e,” Ministru hateten iha edifísiu MEJD, Vila Verde, segunda ne’e.

Governante ne’e preokupa ho kondisaun eskola ne’ebé iha ameasa nia laran, tanba ne’e nia husu ona ba parte tékniku MEJD atu halo ezersísiu hodi bele proteje kondisaun eskola molok udan boot tuun.

Notísia relevante: Eskola EBC 30 Hera presiza morru protesaun

Ho nune’e, bazeia ba preokupasaun Ministru Armindo, maka Diretór Nasionál Dezenvolvimentu Parque Eskolár, Augusto Soares, orienta kedan ninia ekipa téknika sira hodi halo ezersísiu atu halo morru protesaun ida atu asegura eskola.

“Ita simu ona orientasaun hosi Ministru no agora ita hanoin atu halo morru protesaun, maibé ita sei halo de’it bronjon atu antisipa udan,” nia tenik.

Tuir Diretór, bainhira la rezolve maka sei lori ameasa boot ba eskola no komunidade nia uma iha Hera, maibé prosesu la’o daudaun, ne’ebé sei tama iha projetu komunitáriu, nune’e grupu komunitáriu mak sei rezolve.

Verba serbisu ne’e sei la tama ba konkursu públiku tanba ninia kustu menus hosi 50%.

“Bazeia ba regra aprovizionamentu, bainhira kustu projetu ida maka menus hosi 50% la presiza tama ba konkursu públiku maibé liu de’it hosi desizaun internál. Nu’udar tékniku, ami informa ona ba Ministru Edukasaun Juventude no Desportu katak projetu ne’e bele entrega de’it ba komunidade tanba ita uza de’it bronjon,” nia dehan.

Projetu morru protesaun iha mota Hera ne’ebé sei realiza iha tempu badak tuir estimasaun DNDPE ho naruk metru 117 ho ninia kustu estimativu $46.000 resin.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!