iklan

EKONOMIA, HEADLINE

Fulan ne’e, TL-Austrália finaliza diskusaun kontratu fahe produsaun Greater Sunrise

Fulan ne’e, TL-Austrália finaliza diskusaun kontratu fahe produsaun Greater Sunrise

Ministru Petróleu no Minerál, Victor da Conceição Soares. Imajen Tatoli/Francisco Sony

DILI, 08 outubru 2022 (TATOLI)– Ministru Petróleu no Minerál (MPM), Victór da Conceição Soares, hateten daudaun ne’e Governu Timor-Leste ho Austrália hala’o diskusaun ba rejime espesiál sira hanesan rejime Petroleum Mining Code (PMC), rejime fiskál  no dokumentu lubuk ida seluk , nune’e atu tama ba faze diskusaun Kontratu Fahe Produsaun iha kampu Petrolífera Greater Sunrise, hodi konklui iha fulan novembru tinan 2022.

“Ita-nia diskuasaun iha progresu di’ak tebes tanba tama ona ba faze  rejime Petroleum Mining Code (PMC) halo ona diskusaun dala-hira no finaliza ona dokumentu ne’ebé hahú pasa ba malu entre Governu Timor-Leste no Austrália inklui kompañia konsórsiu sira, ne’ebé diskusaun namanas hela no tama agora tama ba diskusaun esbosu Kontratu Fahe Produsaun”, Ministru Víctor, informa ba iha Parlamentu Nasionál, tersa ne’e.

Notísia relevante:  PR Horta vizita Austrália sei ko’alia prosesu dezenvolvimentu Greater Sunrise

Estadu Timor-Leste liuhosi Timor Gás no Petróleu, Empreze Públika (Timor GAP, E.P) hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.

Tuir Ministru katak prosesu hotu tama ona iha diskusaun ronda entre Governu Timor-Leste no Austrália ne’ebé hatudu intendimentu di’ak no iha komprimisiu tinan ikus ne’e  bele konklui  hodi konkorda malu fó ba kompañia konsórsiu sira hodi ezekuta dezenvolvimentu kampu petrolíferu Greater Sunrise nian.

“Timor – Leste no Australia iha ona komprimisiu atu konklui dokumentu hirak ne’e iha novembru nia laran, maibé buat hotu Governu halo kuandu negosiasaun fila ba parte rua se konkorda ita halo akordu, maibé kuandu iha disputa bele mós estensaun ba progresu sira ne’ebé  la’o ona”, nia afirma.

Tuir planu, Governante ne’e dehan diskusaun faze trilateral meeting entre Timor-Leste, Austrália no kompañia konkórsiu sira sei hala’o iha Dili, iha fulan-novembru nia laran.

“Durante ne’e prosesu hotu hala’o iha Austrália, maibé agora Covid-19 laiha ona bele mai halo iha Timor – Leste para diskute iha ne’e. Governu rua foin halo komunikasaun buat hotu la’o di’ak tebes tuir duni tratadu marítima ne’ebé iha”, katak.

Governu Austrália mós apoia tebes Timor-Leste atu finaliza lalais rejime espesiál sira hodi hakat ba dezenvolvimentu kampu Greater Sunrise.

“Estudu viabilidade Greater Sunrise foun ne’e Timor Gap mak halo detalladu no estudu ida ne’e mak bele garante finansiamentu ba kampu Greater Sunrise ne’e. Tanba estudu ne’e la halo mak laiha kompaña ida mak hakarak atu investe, se ita obriga fó impaktu ba finanseiru atu dada kadoras mai Timor – Leste, nune’e estudu ne’e sei konklui iha tempu besik”, Governante ne’e esplika.

Daudaun ne’e, Ministru Victór dehan liuhosi estudu ne’e mak atrai empreza petrolífera lubuk ida hahú espresa sira nia vontade atu investe iha kampu Greater Sunrise.

Tuir tratadu fronteira marítima iha anexu B, artigu 2, hatuur kona-ba Greater Sunrise nia estatutu ne’ebé partilla persentajen, katak bainhira dada kadoras bá Austrália mak Timor-Leste hetan 80% no Austrália 20%, enkuantu dada mai Timor-Leste hetan 70% no Austrália hetan 30%.

OJE 2022 ba MPM

Entretantu, Orsamentu Jeral Estadu (OJE) 2022 ne’ebé aloka ba MPM hamutuk $82.620.903, kompostu hosi kompromisu $97.480,37, obrigasaun $43.459,18, atuál $72.225.279,92, no saldo $10.254.665,53.

Orsamentu hirak ne’e balun aloka mós ba hala’o diskusaun entre Timor-Leste no Austrália ba prosesu dezenvolvimentu kampu petrolíferu Greater Sunrise.

Orsamentu alokadu fahe ba Timor GAP, E.P hamutuk millaun $62, Autoridade Nasionál Petróleu no Minerál (ANPM) millaun $8,5, Institutu Petróleu no Jeolojia (IPG, sigla portugés) millaun $4, Konsellu Mineiru Timor-Leste (CMTL, sigla portugés) $600.000, no MPM rasik millaun $18.

Hosi orsamentu ne’ebé iha MPM ezekuta $10.254.665,53 ka 87% hosi totál alokasaun $82.620.903.

Notísia relevante: MPM atualiza progresu dezenvolvimentu Greater Sunrise ba PR

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!