iklan

JUSTISA, HEADLINE

Kazu fraude fiskál, José Reis konsidera akuzasaun hosi MP la loos

Kazu fraude fiskál, José Reis konsidera akuzasaun hosi MP la loos

Arguidu Jose Reis no Joao Alves, bainhira ba tuir julgamentu iha TDD ,Tersa 8//11/2022.Imajen Tatoli/Antonio Daciparu

DILI, 08 novembru 2022 (TATOLI)— Tribunál Distritál Dili (TDD), tersa (8/11) ne’e, realiza julgamentu ba arguidu José Maria dos Reis, João Baptista Fernandes Alves no Bartolomeo Siqueira ba krime fraude fiskál.

José Reis atuál Vise Primeiru Ministru no Ministru Planu Ordenamentu, João Baptista atuál Vise Prezidente Kâmara Komérsiu no Indústria (CCI-TL, sigla portugés) no Bartolemeu na’in ba kompañia Grand Brother Unipesoal Lda.

Notísia relevante:  TDD julga José Reis no arguidu nain rua seluk ba kazu fraude fiskál

Arguidu sira, ministériu públiku akuza ho krime fraude fiskál, tanba konsidera kompañia Sunhine Petrol Group ne’ebé maka antes ne’e sira harii iha 2000, la kumpri dever hodi selu taxa ba Estadu Timor-Leste, inklui la deklara rendimentu ba Diresaun Impostu Doméstiku.

Perante julgamentu, Arguidu José Reis deklara katak, iha 2001 nia hasoru malu duni ho arguidu João Alves hodi konversa kona-ba planu harii kompañia ida, maibé nia la ko’alia buat ida tanba nia laiha koñesimentu no esperénsia halo negósiu.

“Nune’e, faktu sira hosi akuzasaun sira ne’ebé Ministériu Públiku imputa mai ha’u ne’e la loos hotu no falsu,” hatete arguidu José Reis iha sala julgamentu TDD, tersa ne’e.

Kona-ba akuzasaun Ministériu Públiku katak iha loron 5 novembru 2002 to’o 24 juñu 2016, empreza Sunhine Petrol Group hahú rejistu ho TIN 1018089 ho sede rua Audian Vera, Cruz Dili, konsorsiu João B.F Alves ho sosiu 40% (saham) Bartolomeu Siqueira 30% no José Reis ho sosiu 30% ho atividade ekonómika komersiál kombustivél ba veíkulu sira.

Iha 2009 no 2011 empreza ne’e kontratu ho governu hodi fornese mina ba EDTL. Iha loron 10 novembru 2010, Estadu RDTL halo ona pagamentu ba konta bankaria empreza Sunhine Petrol Group ho númeiru konta 193544210001 ho montante $5.235.637.52 (tokon lima rihun atus rua tolu nulu resin lima, atus neen tolu nulu resin hitu, sentavus lima nulu resin rua) dolar amérikanu, tuir TPO 10211955.

“Ha’u laiha koñesimentu hotu kona-ba prosesu kompañia Sunhine Petrol Group nia ejisténsia tanba ha’u la envolve to’o hetan kontratu hosi Governu hodi halo fornesimetu mina iha 2010. Ha’u rejeita tanba ha’u laiha sosiu 30% hanesan saida maka akuzasaun hosi Ministériu Públiku, tanba momentu ne’ebá la hasai osan ruma atu tau iha kompañia ne’e”, rejeita Arguidu José Reis.

Arguidu José Reis sente hakfodak bainhira iha 2018, Komisaun Anti Korrupasaun (CAC, sigla portugés) bolu nia hodi investiga kona-ba kompañia Sunhine Petrol Group la selu taxa ba Estadu hosi 2011 to’o 2017 no fó prejuizu bo’ot ba Estadu

“Husu ba tribunál buka tuir autór ne’ebé lori ha’u nia naran liuhosi kompañia ne’e hodi hamosu prejuizu ba Estadu ho osan millaun $5 tanba ida ne’e krime no nia tenke responsavél, tanba ha’u laiha koñesimetu kona-ba prosesu sira ne’e hotu”, katak José Reis

Iha biban hanesan, Advogadu Privadu, José Guterres, rekerre ba tribunál atu haree legalidade Prokuradór ne’ebé maka ka’er kazu fraúde fiskál ne’ebé envolve hosi nia kliente (José Reis) no arguidu nain-rua seluk.

“Tuir estatutu Ministériu Públiku (MP) katak Prokuradór Titulár ne’ebé ka’er kazu korrupsaun boot ne’e tenke primeira klase,” nia afirma.

Hataan ba kestaun ne’e, Prokuradora Lidia Soares ne’ebé ka’er kazu arguido José Reis no arguidu nain-rua seluk ne’e afirma atu troka fali prokuradór ba kazu ne’e desizaun tenke mai hosi Konsellu Superiór Ministériu Públiku nian.

Haree ba rekursu umanu ne’ebé la sufisiente, Prokuradóra Lidia husu ba Tribunál liuhosi juis  koletivu atu indefere pedidu rekerimentu hosi parte Defeza Advogadu José Guterres nian.

Hafoin rona tiha parte rua, Juiz koletivu, José Gonsalves hatun despaisu hodi indefere pedidu rekerimentu ne’ebé aprezenta hosi Defeza Arguidu José Reis no Advogadu Privadu José Guterres hodi kontinua autoriza Prokuradór Lidia Soares ka’er kazu José Reis inklui arguidu nain-rua seluk.

Tribunál mós deside adia prosesu julgamentu ne’e ba loron 6 dezembru 2022, tuku 14:00, lokoraik hodi kontinua rona sansin na’in-rua.

Audénsia julgamentu ne’e Prezide hosi juís kolletivu José Gonsalves, Alvaro Maria no Argentino Nunes, MP reprezenta hosi Prokuradora Lidia Soares no arguidu sira hetan asisténsia legál hosi Advogadu Privadu José Guterres no Arlino Sanches.

Notísia relevante:  Kazu fraude fiskál, arguidu João Baptista deklara akuzasaun MP la loos

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!