DILI, 09 novembru 2022 (TATOLI)–Governu liuhosi reuniaun Konsellu Ministru (KM) ordináriu, kuarta ne’e, aprova projetu dekretu-lei kona-ba regulamentu apoiu finanseiru ne’ebé atribui ba kombantente veteranu libertasaun nasionál ida-idak, ne’ebé dezmobilizadu hosi luta durante tinan 15 to’o 19 ba abitasaun nian.
Projetu dekretu-lei ne’e aprezenta hosi Ministru Asuntu Kombatente Libertasaun Nasionál, Júlio Sarmento da Costa ‘Meta Mali’.
“Projetu dekretu-lei ne’e fiksa apoiu finanseiru ho valór $40.000, ne’ebé sei atribui ba kombatente veteranu libertasaun nasionál, ne’ebé dezmobilizadu hosi luta durante tinan 15 to’o 19, maibé seidauk iha uma dignu no adekuadu, no daudaun ne’e halo hela ninia uma rasik, maibé seidauk ramata, ka ne’ebé iha ona uma dignu no adekuadau,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Estabelese sekretariadu Fundu Kombatente Libertasaun Nasionál
Biban hanesan, Ministru Asuntu Kombatente Libertasaun Nasionál, aprova ona projetu dekretu Governu rua hanesan aprovasaun norma kona-ba organizasaun no funsionamentu Sekretariadu Fundu Kombatente Libertasaun Nasionál.
Sekretariadu ne’e iha misaun atu fó apoiu administrativu ba Konsellu Administrasaun Fundu Kombatente Libertasaun Nasionál hodi halo kompétensia ida-idak.
“Sekretariadu ne’e kompostu hosi funsionáriu, ajente ka traballadór administrasaun públika ne’ebé hala’o serbisu iha Gabinete Primeiru-Ministru, Ministru Finansa no Ministériu Asuntu Kombatente Libertasaun Nasionál. Ninia membru sira sei hala’o funsaun ida-idak iha rejime tempu parsiál no sei laiha direitu ba kualkér akrésimu remunerasaun, inklui suplementu remunerartóriu ka regalia,” Portavoz Governu tenik.
Notísia relevante: Governu inaugura ona uma ba veteranu grau 20-24 hamutuk 20-resin
Aleinde ne’e, aprova mós valór seña prezensa atu selu membru Komité Investimentu Fundu Kombatente ba Libertasaun Nasionál ba sorumutuk ida-idak órgaun ne’ebé maka sira sei partisipa.
Nune’e, membru Komité Investimentu sira sei hetan direitu atu simu seña presenza ida ho $1.000 hosi kada sorumutuk órgaun ne’ebé sei partisipa.
“Komité Investimentu nian bele hala’o de’it sorumutuk kada fulan dala ida. Komité Investimentu nu’udar órgaun konsulta, apoiu no partisipasaun ba definisaun polítika investimentu ba Fundu Kombatente Libertasaun Nasionál no ba deliberasaun Konsellu Administrasaun,” nia esplika.
Jornalista : Antónia Gusmão
Editora : Julia Chatarina
