iklan

NASIONÁL, HEADLINE, KAPITÁL

Ajente administrasaun públika tenki uza farda hodi fasil kontrola

Ajente administrasaun públika tenki uza farda hodi fasil kontrola

Deputadu sira halo votasaun ba proposta orsamentu ba Ministériu Finansa iha faze jeneralidade, iha sala plenária PN, segunda (14/11). Imajen Tatoli/Francisco Sony

DILI, 14 novembru 2022 (TATOLI)–Ministru Finansa, Rui Augusto Gomes, hateten, funsionáriu administrasaun públika, liuliu funsionáriu Ministériu Finansa (MF) tenki uza farda, nune’e dirijente sira fasil atu kontrola.

“Vistuáriu ka farda ba funsionáriu sira, ida-ne’e atu aplika disiplina ba ita-nia funsionariu sira durante oras serbisu atu sira labele ba hemu kafé no tuur iha Hotel Timor ka fatin seluk, ne’ebé fasil atu monitoriza no aplika sansaun. Ida-ne’e ba sira ne’ebé la disiplina,” Ministru Finansa relata iha ámbitu debate Proposta Lei Orsamentu Jerál Estadu (OJE) 2023, iha faze espesialidade, iha plenária Parlamentu Nasionál (PN), segunda ne’e.

Notísia relevante: Ekipa interministeriál sei aprezenta dezeñu uniforme uza tais ba KM

Inisiativa ne’e implementa bazeia ba dekretu-lei númeru 2/2022, 08 janeiru, ne’ebé regulariza iha diploma ministeriál númeru 86/2021, 29 dezembru, ne’ebé ho hanoin katak funsionáriu Alfándega nia farda bosan ona kompara ho funsionáriu iha nasaun viziñu.

“Sira bainhira ba reuniaun ruma tenke ba hatais farda, liliu reuniaun internasionál ha’u hanoin ida-ne’e mós aspetu ida ne’ebé ita presiza tau-matan,” nia akresenta.

Enkuantu, farda ba funsionáriu MF tomak sei distribui ba funsionariu tomak to’o fim tinan ne’e.

Governu liuhosi Ministériu Turizmu, Komérsiu no Indústria (MTKI) hamutuk ho liña ministériu sira, daudaun haree hela kondisaun atu uniforme ba ajente administrasaun públiku tomak ho materiál tais.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!