iklan

EKONOMIA, BOBONARO, HEADLINE, MUNISÍPIU

MTKI lansa kompetisaun negósiu inovativu datoluk iha rejiaun Oeste

MTKI lansa kompetisaun negósiu inovativu datoluk iha rejiaun Oeste

Ministériu Turizmu, Komérsiu no Indústria (MTKI) ho parseiru dezenvolvimentu sira halo akompañamentu ba kompetisaun planu negósiu inovativu iha munisípiu Bobonaro ba rejiaun oeste. Imajen Tatoli/Sérgio da Cruz.

BOBONARO, 16 Novembru 2022 (TATOLI)-Ministériu Turizmu, Komérsiu no Indústria (MTKI), kuarta lansa  kompetisaun negósiu inovativu datoluk iha rejiaun oeste, komposta hosi munisípiu Bobonaro, Liquiçá no Ermera ho totál konkorrente na’in-60.

Enkuantu kompetisaun planu negósiu sei foka ba área produtivu sira hanesan agrikultura, peska, turismu no indústria ne’ebé sei fó vantajen ba emprezáriu mikro, pekena no médiu, kooperativa no grupu joven sira hodi hetan insentiva hanesan ekipamentu ne’ebé presiza.

Kritéria importante ba kompetitór sira mak hanesan, joven feto-mane idade 18 to’o 35, joven ne’ebé iha ideia negósiu inovativu iha setór produtivu, atividade negósiu tenke lokaliza tuir munisípiu haat no foin sa’e sira-ne’ebé hahú ona atividade negósiu.

Konkorrente na’in-60 ne’e durante loron tolu nia laran, ekipa juri sira sei avalia proposta ne’ebé submete ona, hafoin parte MTKI sei ba halo vizita lokaliazaun atividade, atubele apár ho proposta.

Tuir planu manán-na’in sei hetan ekipamentu ka materiál ba negósiu ho valór orsamentu rihun $1 to’o rihun $10.

Programa refere MTKI hala’o serbisu hamutuk ho autoridade munisipál haat, PNUD, KOICA no Institutu Apoia Dezenvolvimentu Emprezariál (IADE).

Vise-Ministru Turizmu, Komérsiu no Indústria, Domingos Lopes Antunes, hateten, kompetisaun tinan hirak ba kotuk realiza de’it iha nível nasionál, maibé tinan ne’e hakarak implementa iha munisípiu hotu ho objetivu  atu enkoraja no motiva emprezáriu lokál sira atu iha negósiu inovativu no kria empregu ba komunidade sira hodi  promove diversifikasaun ekonomia iha baze.

“Governu nia intensaun atu ajuda duni sidadaun Sira, liuliu joven sira-ne’ebé iha inisiativa atu hamoris ekonomia hosi baze. Sé maka iha produtu balu iha orientasaun ba subtitui produtu importasaun ka bele esporta ita bele ajuda,” nia hateten iha intervensaun ba kompetisaun ne’ebé realiza iha edifísiu Alfándega munisípiu Bobonaro.

Programa refere parte hosi kontinuasaun hosi kompetisaun inovativu ne’ebé hala’o ona iha tinan-2021 no 2022 ne’ebé prodús ona emprezáriu hamutuk 44, komposta hosi 29 hosi kompetisaun dahuluk no 15 hosi kompetisaun faze daruak ho totál orsamentu rihun $300.

Domingos akresenta VIII governu lideradu hosi Primeiru Ministru, Taur Matan Ruak, nafatin atu harii ekonomia ne’ebé forte no lakohi hatoman emprezáriu sira no povu ho subvensaun públika, maibé tenke kria responsabilidade atu hetan apoia hosi governu.

“Ita labele hein osan fundu mina-rai mamuk tiha mak ita halo esforsu, ha’u hanoin iha dezafiu barak mak ita enfrenta, maibé ita koko intorodús programa sira-ne’e atu diversifika ita-nia ekonomia iha baze, ho intensaun atu kria empregu no kria rendimentu,” nia hatutan.

Sekretáriu Autoridade Munisípiu Bobonaro, João do Carmo de Fátima, agradese ba Governu no parseiru Dezenvolvimentu, UNDP tanba bele iha inisiativa implementa programa ne’e iha nível munisípiu.

“Atividade sira hanesan ne’e bele fó motivasaun ba ita-nia maluk foin sa’e sira, tanba ita hotu hatene, durante ne’e governu no ajénsia dezenvolvimentu lubuk ida fó apoia lubuk ida ona ba joven sira, entaun ida-ne’e ajuda liután sira+ne’ebé halo ona programa HAPAS nian, hanesan hakiak animál, peska no ortikultura,” nia dehan.

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!