iklan

JUSTISA, HEADLINE

Tribunál liberta manifestante na’in-26 hosi sela detensaun

Tribunál liberta manifestante na’in-26 hosi sela detensaun

Manifestante na’in-26 hosi Aliansa Maubere Nasionál (AMN) submete ba prosesu sumáriu iha TDD, kuarta (16/11). Imajen/ Natalino Costa.

DILI, 16 novembru 2022 (TATOLI)— Manifestante na’in-26 hosi Aliansa Maubere Nasionál (AMN), kuarta (15/11), hetan libertasaun hosi Tribunál Distritál Dili (TDD), hafoin kumpre detensaun oras 72 iha sela Komandu Polísia Munisípiu Dili.

Iha prosesu sumáriu ne’ebé prezide hosi Juiza Ana Paula Fonseca, hatuun despaisu liberta manifestante nain-26 hosi sela dentensaun hodi fila ba uma hein desizaun tribunál nian, segunda (21/11). Razaun Tribunál ordena manifestante sira sai hosi detensaun tanba kompleta ona detensaun oras 72.

Notísia relevante:  PNTL Dili detein manifestante na’in-39 

AMN kontinua halo manifestasaun kontra desizaun Parlamentu Nasionál, iha kampus sentrál UNTL oin, kuarta (16/11). Imajen Tatoli/António Daciparu

Manifestante nain-26 ne’e, Polisia Nasionál Timor-Leste (PNTL) detein tanba viola lei iha númeru 5/2006 kona-ba lei manifestasaun nian ne’ebé tenke dook ho metro 100 hosi edifísiu públku no harahun vidru janela no odamatan Universidade Nasionál Timor-Leste (UNTL).

Ministériu Públiku (MP) nu’udar asaun penál akuza arguidu na’in-26 ho krime dezobidensia ne’ebé previstu artigu 193 hosi kódigu penál Timor-Leste, ne’ebé iha númeru 1 hateten ema ne’ebé la tuir orden lejítima atu sai hosi ajuntamentu ka reuniaun públika, ne’ebé autoridade lejítima fó, ho avizu katak, nia la tuir karik, nia halo krime ida, sei hetan pena prizaun to’o tinan 2 ka multa.

Nune’e, iha alegasaun ba prosesu sumáriu ne’e Ministériu Públiku kosidera katak arguidu nain-26 komete dezobidénsia duni ba iha regra distansiamentu manifestasaun nian metru 100 ho, nune’e MP la husu kastigu espesifíku, maibé husu tribunál atu tetu no aplika.

Hafoin rona tiha parte hotu, Tribunál Distritál Dili liuhosi Juiza Ana Paula Fonseca deside desizaun ba arguidu nain-26 ba loron 21 novembru 2022, tuku 17:00, lokoraik.

Prosesu sumáriu ne’e prezide hosi Juiza Ana Paula Fonseca, Ministériu Públiku reprezenta hosi Prokuradór Hipolito no arguidu sira hetan asiténsia legál hosi Advogadu Privadu nain-haat.

Notísia relevante: Asaun pasífiku hasoru PN, PNTL husu AMN respeita lei manifestasaun

Jornalista: Natalino Costa      

Editór       : Florencio Miranda Ximenes

iklan
iklan

Leave a Reply

iklan
error: Content is protected !!