iklan

EDUKASAUN, HEADLINE

Estudante 129 sei hahú programa mestradu no doutoramentu iha UNTL

Estudante 129 sei hahú programa mestradu no doutoramentu iha UNTL

Edifísiu sentrál Univesidade Nasionál Timor-Lorosa'e. Imajen Tatoli/Francisco Sony

DILI, 24 novembru 2022 (TATOLI)—Estudante hamutuk 129 sei hahú programa mestradu no doutoramentu iha Universidade Nasionál Timor-Lorosa’e (UNTL), ne’ebé foin lansa iha tinan akadémiku 2022.

Reitór UNTL, João Soares Martins, hateten, serimónia solene lansamentu kursu iha UNTL ba tinan akadémiku 2023, hahú ho programa mestradu haat no doutoramentu ida.

“Ita sei hahú kursu haat ba nível mestradu ho kursu foun ba mestradu lian portugés iha kontestu Timor ba segunda edisaun, pás no konflitu, dezenvolvimentu komunitária primeira edisaun, no medisina tropikál saúde komunitária,” Reitór informa iha salaun Katedrál Vila Verde, kinta ne’e.

Notísia relevante: Inisia kursu mestradu, MESSK enkoraja UNTL asegura prosedimentu legál no institusionál

Estudante hamutuk 116 ne’ebé hanesan dosente sei partisipa iha programa mestradu kursu haat, kompostu hosi kursu mestradu lian portugés iha kontestu Timor ba segunda edisaun iha estudante 25, estudu pás no konflitu iha 26, dezenvolvimentu komunitária primeira edisaun iha 27 no medisina tropikál saúde komunitária iha 38.

“Entre kursu mestradu haat ne’ebé eziste, daudaun ne’e úniku nível mestradu ba kursu medisina tropikál saúde komunitária mak foin hetan aprovasaun hosi Ministériu Ensinu Superior Siénsia no Kultura iha fulan hirak liubá.

Enkuantu, ba programa doutoramentu nian iha totál estudante hamutuk 13.

Tuir Reitór, durasaun tempu ba estudante no dosente sira ne’ebé envolve-an iha programa rua ne’e sei la hanesan, mestradu ninia tempu tinan-rua no doutoramentu tinan-tolu maibé depende ba kapasidade estudante atubele finaliza kursu tuir tempu ne’ebé termina ona.

“Depende ba sira ida-idak, kuandu sira estuda ho didi’ak, ha’u hanoin tinan-rua ka tinan-tolu ne’e dalaruma la to’o tan bele finaliza ona, tanba ne’e estudante presiza foku duni iha kursu rua ne’e,” nia tenik.

Universidade nasionál introdús programa rua ne’e, ho kooperasaun universidade sira iha Brazil.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!