Simu kondekorasaun, Doutór Noel Bayley agradese Prezidente Repúblika
DILI, 29 novembru 2022 (TATOLI)— Iha seremónia Komemorasaun Proklamasaun Independénsia Timor-Leste ba dala-47, Prezidente Repúblika, José Ramos Horta fó Kondekorasaun ho tipu medalla Méritu ba Doutór Espesialista fuan, Noel Bayley hodi valoriza nia kontribuisaun ba atendimentu médiku ba Timoroan sira ne’ebé sofre kardiovaskular.
Xefe Estadu fó rekoiñesimentu ne’e tuir artigu 85 aliña 5, artigu 2 dekretu-lei númeru 15/2009, 18 marsu hodi kondekora doutór espesialista ne’e ho medalla méritu.
“Agradese ba kondekorasaum ne’ebé Prezidente Repúblika fó iha loron proklamasaun ne’e, kondekorasaun ne’e tanba ha’u serbí ona Timor – Leste durante tinan 20 hodi salva labarik sira sofre fuan no labarik barak mak ha’u salva ona nia vida”, dehan Doutór Noel iha Palásiu Prezidensiál Dili, tersa ne’e.
Nia mós informa ba Prezidente Repúblika katak durante tinan 20 tulun ona labarik sira ne’ebé sofre fuan hamutuk 100-resin hodi halo operasaun iha Austrália hosi númeru ne’ebé mensiona barak liu salva vida no uitoan mak la konsege salva tanba grave liu.
“Ha’u Sente katak 28 novembru ne’e sai momentu importante mai ha’u hodi simu kondekoasaun hosi Prezidente Repúblika tanba ida ne’e mak ohin loron hamutuk ho ekipa hasoru Prezidente atu hato’o agradesimentu,” nia dehan.
Xefe Estadu haksolok ho prezensa ninian hodi husu atu apoiu liután servisu ne’ebé nia hala’o ona hodi salva labarik sira ne’ebé moras fuan iha tinan sira mai oin. Durante ne’e ekipa hala’o atividade tratamentu fuan ba labarik sira iha Hospitál Nasionál Guidu Valadares (HNGV) no Austrália.
Jornalista: Hortencio Sanchez
Editór : Florencio Miranda Ximenes
