iklan

NASIONÁL, HEADLINE, KAPITÁL

Ahi kontinua mate iha kapitál Dili kauza empreza halo manutensaun liña ezistente

Ahi kontinua mate iha kapitál Dili kauza empreza halo manutensaun liña ezistente

Ekipa téknika EDTL, E.P halo instalasaun ba iluminasaun iha estrada ibun Portu Dili, segunda (16/05). Imajen Tatoli/Francisco Sony

DILI, 01 dezembru 2022 (TATOLI)—Prezidente Konsellu Administrasaun Eletricidade de Timor-Leste (EDTL, E.P), Paulo da Silva, hateten, kondisaun ahi mate iha kapitál Dili tanba empreza halo manutensaun rutina ba liña ezistente.

“Ita rekoñese iha kapitál Dili, dalaruma ahi kontinua mate tanba ita iha programa ida halo manutensaun ba liña ezistente ka feeder iha kapitál Dili, entaun ita tenke hamate ahi atu tékniku hosi empreza sira halo manutensaun,” Prezidente Konsellu Administrasaun EDTL, E.P hateten ba Agência Tatoli liuhosi programa entrevista eskluziva, iha estúdiu Farol, kinta ne’e.

Aleinde ne’e, kondisaun dezastre naturál hanesan udan, anin, ai tohar no monu ba fiu leten ka tripu avaria, obriga tenke halo ahi mate.

“Ida-ne’e presiza hamate ahi nune’e bele halo intervensaun. Daudaun ne’e ita iha empreza hamutuk 12 mak halo hela manutensaun ba liña ezistente iha Dili laran, sei la’o hela seidauk konklui manutensaun tanba limitasaun oras inklui manutesaun ba liña ezistente ne’e difísil liu kompara monta foun,” Paulo akresenta.

Notísia relevante: EDTL, E.P rekolla reseita millaun $39,6 iha janeiru to’o outubru

Nia dehan, ekipa sira sei la hamate ahi hodi halo manutensaun iha segunda to’o sesta tanba kada edifísiu presiza ahi lakan hodi halo serbisu, tanba ne’e manutensaun halo iha sábadu no domingu.

“Ida-ne’e lori tempu kleur oituan atu konklui tanba ita fó tempu ba sira halo manutensaun oras rua de’it. Entaun ida-ne’e hanesan dezafiu ida, maibé ita mós hamutuk nafatin ho empreza sira hodi halo intevensaun atu redús ahi mate,” nia tenik.

Enkuantu, kona-ba rekursu umanu EDTL, E.P, iha tinan kotuk halo rekrutamentu ba ema 260 resin hodi sai asistente tékniku ba liña transmisaun no liña distribuisaun hodi reforsa iha postu administrativu sira iha munisípiu.

“Maibé seidauk to’o no tinan ida-ne’e sei halo tan rekrutamentu ba ema 60 resin atu reforsa tan pesoál sira iha munisípiu. Iha munisípiu sira, ba oin ita presiza mínimu ema  lima ka neen iha kada postu administrativu sira hodi nune’e bele servisu di’ak liu,” nia salienta.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!