Kazu SDSB, PCIC suspeita Diretór Kompañia Betford

DILI, 07 dezembru 2022 (TATOLI)-Portavóz Polísia Sientifika Investigasaun Kriminál (PCIC , sigla portugés), Octavio da Costa Araújo, hateten, PCIC suspeita oba Diretór kompañia Betford, Key Xavier tanba la selu manán-na’in Adelino.
“Ita suspeita ona Diretór Kompañia Betfiord tanba bainhira vítima ida hato’o keixa ba iha PCIC katak nia kona SDSB ne’e hola hosi kompañia Betford maibé kompañia la selu, tanba ita halo prosesu ba nia hodi suspeita nia nu’udar suspeitu ba kazu ne’e,” Portavós PCIC, Octavio ba jornalista sira iha iha kna’ar fatin, Colmera, kuarta ne’e.
Portavós PCIC, Octavio da Costa Araújo, haktuir iha loron (6/12), iha sidadaun ida mai keixa iha PCIC katak nia sosa kupon SDSB hosi kompania Betford iha nia kupon ne’e nia kona SDSB ne’e maibé kompañia la selu depois mosu dezentedimentu.
“Entaun bainhira nia aprezenta tiha keixa, emediatamente ekipa PCIC iha momentu ne’e kedas tún kedas ba halointervensaun, hodi foti informasaun halo identifikasaun ba suspeitu no testemuña na’in-haat sira-nia deklasaun,” nia afirma.
Nia dehan, ekipa PCIC rekolla evidénsia sira hanesan CCTV haat iha fatin ne’ebé maka vítima hola kupon iha SDSB, no asegura kupon SDSB ne’ebé momentu vítima hola hola iha kompañia ne’e hodi sai hanesan prova hodi nesesita ba iha prosesu.
Iha fatin hanesan, Diretór Kompañia Lotária Betford, Key Xavier, klarifika katak kazu la selu sidadaun ida-ne’ebé kona SDSB ne’e tanba iha prosesu fa’an SDSB mosu manobra ne’ebé halo hosi nia funsionáriu rasik.
Nia rekoñese, iha duni sidadaun ida mai hola SDSB iha kompañia Lotária Betford iha segunda (5/12), maibé bainhira funsionáriu atu hatama kupon nian latuir prosesu ne’ebé maka iha.
Rekizitus maka primeiru ema ne’ebé maka atu hatama kupon ne’e nia tenke ser lori kupon ba entrega iha meja ida depois iha ne’ebá funsionáriu sira sei check totál folla kupon nian no osan totál hosi faan kupon ne’e rasik.
Nune’e maka foin ba entrega tán fali iha meza seluk hodi konta manuál antes hatama ba iha sistema.
“Agora iha prosesu ida-ne’e , ha’u-nia funsionáriu ne’ebé fa’an kupon nia la halo tuir hanesan ne’e, baihira ba hatama kupon SDSB folla nia la hatama nia dikte de’it ba funsionariu osan maka nia konsege hatama. Depois funsionáriu ne’e hahú husu ba nia atu check kupon hodi konfirma númeru iha folla ne’e, maibé nia la konsege fó, nia dehan depois maka ha’u ba entrega de’it kupon ne’e iha sorin,” Key Xavier hateten.
Nia haktuir, hafoin ida-ne’e bainhira funsionáriu sira parte sistema nian atu konta totál osan no folla kupon SDSB ne’ebé tama ho manuál antes atu hatama ba sistema, funsionariu sira komesa konfere ona katak folla SDSB nian falta 112.
“Entaun ami hahú deskonfia katak iha ona manobra iha-ne’e, tanba kupon barak maka sei iha funsionáriu ne’e no nia seidauk hatama inklui kupon hosi sidadaun ne’ebé kona SDSB ne’e. Depois númeiru sai, funsionáriu ne’e hahú halo tun sa’e, tanba ne’e ha’u deside la selu sidadaun ne’e tanba mosu manobra iha prosesu ne’e ,” Key Xavier afirma.
Nia dehan, ezijénsia hosi sidadaun harak kompañia selu nia osan ne’ebe nia kona SDSB ho montante 480.000.
Maske nune’e, Key Xavier, hateten, prosesu tama ona iha PCIC, evidénsia sira hanesan CCTV ba kazu ne’e PCIC rekolla hotu ona.
“Ha’u promete sei selu sidadaun ne’e nia osan, maibe hein desizaun tribunál tanba prosesu ne’e mai ona iha PCIC no karik aban bainrua maka ba Tribunál deside selu, ha’u prontu selu sidadaun ne’e,” nia informa.
“Karik prosesu ne’e maka loos, ha’u sei selu sidadaun ne’e nia osan, tanba buat ne’e la’ós foin akontese ema kona boot liu ida-ne’e ha’u selu,” nia katak.
Notísia relevante: Manán lotária, kompañia Berford la selu Adelino Baptista
Jornalista: Natalino Costa
Editór: Evaristo Soares Martins

