Estudante 4,292 hosi Bobonaro aprovadu iha ezame nasionál
BOBONARO, 12 dezembru 2022 (TATOLI) – Bazea ba rezultadu finál hosi Ministériu Edukasaun, Juventude no Desportu (MEJD), estudante finalista munisípiu Bobonaro komposta hosi ensinu báziku, ensinu sekundariu jerál no tékniku vokasionál hamutuk na’in-4,292 mak aprovadu iha ezame nasionál tinan letivu 2022.
Tuir dadus totál partisipante estudante nível ensinu báziku na’in 2.541. hosi númeru ne’e auzente 0, prezente 2,451, aprovadu 2,539, no reprovadu na’in-rua.
Enkuantu nível ensinu sekundariu jerál totál partisipante 1,244, auzente neen, prezente 1,238, aprovadu 1,234 no reprovadu haat. Ba fali nível tékniku vokasionál (TEKVOK) totál partisipante 519 aprovadu hotu kedas.
Notísia relevante: Estudante 50.752 aprovadu ezame nasionál no 18 la pasa
“Ha’u fó parabéns ba imi hotu ne’ebé pasa iha ezame nasionál, liuliu ba alin sira-ne’ebé hetan mellora klasifikadu iha nível munisípiu no mós kada eskola,” Diretor Edukasaun Munisípiu Bobonaro, Crispim Lopes Moniz, hato’o felisitasaun ne’e hafoin iha ámbitu distribuisaun envelope ba finalista sira, iha ESG númeru 1 Dom Martinho da Costa Lopes, Maliana, segunda ne’e.
Nia subliña, estudante ne’e hetan mellora klasifikadu nível nasionál sei hetan prémiu ho valór osan montante $5.000, nível munisipál $2,250 to’o kintu lugar $1,700, maibé seidauk bele fó-sai ba publiku naran estudante sira-nian.
“Tuir saida mak ami simu, ninia publikasaun mellor klasifikadu ne’e, tanba la fó-sai iha Dili, entaun ami iha-ne’e mós labele fó-sai ba mídia,” nia katak.
Nia husu estudante sira tenke badinas liután, uza mídia ho proporsionál no sentidu nune’e bele aumenta koñesimentu iha prosesu aprendizajen.
Nia mós husu ba inan-aman sira atu nafatin akompaña oan sira iha uma, tanba xave ba edukasaun ida mak mai hosi uma laran.
Notísia relevante: MEJD anunsia estudante 57,328 aprovadu iha ezame nasionál
Jornalista : Sérgio da Cruz
Editór : Evaristo Soares Martins
