DILI, 13 dezembru 2022 (TATOLI)— Komandante Unidade Polísia Tránzitu, munisípiu Dili, Inspetór Polisia Domingos Gama, informa hahú inisiu fulan-dezembru ne’e, konsege rekolla reseita $1.799 ba kofre Estadu.
“Reseita ne’e rekolla liuhosi pasa-revista ka operasaun ba motorista sira liuliu adeptu futeból sira ne’ebé viola kódigu estrada hahú hosi loron 3 to’o loron 9”, Komandante Tránzitu ne’e hateten ba jornalista sira iha Komandu PNTL Munisípiu Dili, Caicoli, tersa ne’e.
Nia afirma reseita ne’e maioria mai hosi infratór-sira hosi adeptu futeból Copa Mundiál 2022, liuliu adeptu ba ekipa selesaun nasionál hosi Argentina, Espanã no Portugál.
“Ita halo apreensaun ba sira nia motorizada no aplika multa ba sira hodi ba selu iha banku mak foin lori fila sira evidénsia mai hodi lori sai nia motór”, katak nian.
Daudaun ne’e, motoizada barak sei para iha Komandu Dili tanba sira laiha kapasidade atu selu multa, maibé PNTL sei la tolera, tanba polisia serbisu tuir lei no orden no sei ezekuta.
“Ha’u hanoin reseita sira ne’ebé ohin ita mensiona $1.799.00 ne’e ba infratór sira ne’ebé maka selu ona multa, enkuantu infratór balun mós seidauk selu koima ekivalente osan $68.
Notísia relevante:PNTL husu adeptu futeból kumpre lei kódigu estrada
Jornalista: Natlino Costa
Editór : Florencio Miranda Ximenes
