Servisu Saúde Munisípiu Dili rejista kazu dengue ualu
DILI, 15 dezembru 2022 (TATOLI)— Diretór Servisu Saúde Munisípiu Dili, Agostinha Segurado, informa iha semana dahuluk fulan-ne’e, fasilidade saúde iha sira konsege rejista kazu dengue ualu hosi área risku sira iha munisípiu Dili.
“Ita rejista kazu ualu,liuliu iha área risku sira hanesan Dom-Aleixo, Cristo-rei no Vera-Cruz”, Diretora ne’e hateten ba Agência TATOLI, iha Sentru Saúde Vera-Cruz, sesta ne’e.
Kazu dengue ne’e maioria afetadu ba labarik sira ho idade 12 mai kraik, maibé hafoin simu tratamentu sira rekupera hotu no fila ona ba uma.
“Ita nafatin iha problema lixu, maibé komunidade laiha konsensia atu halo limpeja, nune’e husu ba komunidade sira atubele hala’o limpeja hodi prevene moras dengue”, nia konfirma.
Hosi janeiru too mai dezembru, kazu dengue hamutuk 4.000-resin no mate na’in-39. Enkuantu kona-ba ai-moruk abate no fomigasaun nia estoke sufisiente atu halo atusaun ba iha área risku sira hodi prevene dengue.
Menus profisionál saúde
Diretora ne’e akresenta, iha tinan oin, Servisu Saúde Munisípiu Dili kontinua presiza nafatin profisionál saúde hodi halo atendimentu ba populasaun sira.
“Ami presiza profisionál saúde iha tinan oin atu reforsa programa saúde na familia nian. Nune’e ami haruka ona lista profisionál saúde husi ba Ministériu Saúde atu rekruta tan pesoál saúde 200- resin”, nia afirma.
Responde kestaun ne’e, Ministra Saúde, Odete Maria Freitas Belo, hateten laiha intensaun atu hapara profisionál saúde sira, maibé haree fila-fali sira nia termu kontratu tanba durante ne’e kontratu ho osan COVID-19.
“Ha’u hein diretór servisu saúde sira atu fó klarifikasaun mai ha’u tanba ita mós haree ba orsamentu COVID-19 no ita la’ós la presiza, maibé ita nafatin presiza sira nia atendimentu ba komunidade sira”, nia afirma.
Profisionál saúde hnaesan médiku, enfermeiru,parteira, tékniku aliadu, sira ne’e la servisu iha MS atu hapara sira nia kontratu, maibé ida ne’ebé mak servisu iha MS obrigasaun atu kontinua sira nia kontratu depende ba nesesidade Ministériu saúde nian.
Jornalista : Felicidade Ximenes
Editór : Florencio Miranda Ximenes
