Vendedór sira partisipa formasaun violénsia bazea ba jéneru iha Baucau
BAUCAU, 16 dezembru (TATOLI) – Vendedór mane no kondutór transporte publiku hamutuk na’in-40 tuir formasaun bazea ba jéneru no violénsia kontra feto no labarik feto hosi parseiru dezenvolmemtu TOMAK no UN Women iha Baucau.
Jerente Programa To’os ba Moris Di’ak (TOMAK) Munisípiu Baucau, Isaac Ribeiro, esplika, formasaun refere ho objetivu hasa’e koñesimentu kona-bá violénsia bazea ba jéneru no violénsia kontra feto no labarik feto iha fatin públiku.
“Maioria feto mak sai vítima iha fatin públiku hanesan violénsia seksuál tanba ne’e inportante atu kondutór transporte públiku sira hatene foti responsablidade hodi hapara violénsia seksuál hosi mane hasoru feto,” Jerente Programa TOMAK) Munisípiu Baucau hateten iha Vila Nova, sesta ne’e.
Formasaun ne’e hala’o durante loron-ida liuhosi serbisu hamutuk entre Autoridade Munisipál Baucau, TOMAK, UN Women no Asosiasaun Vendedór Merkadu Baucau.
Tema hosi formasaun violénsia bazea ba jéneru no violénsia kontra feto no labarik feto ba vendedór mane, kondutór no na’in ba transporte públikuu iha munisípiu Baucau ne’ebé partisipa hosi kondutór, vendedór mane hamutuk na’in-40.
Matéria importante hosi ne’ebé hato’o hanesan introdusaun kona-bá Baucau no merkadu seguru, violénsia bazea ba jéneru, asedu seksuál no maskulinidade pozitivu.
“Espera partisipante sira bele prátika no hatutan ba maluk seluk kona-bá konseitu prevensaun violénsia bazeia ba jéneru, liuliu ba hasoru feto no labarik feto iha fatin públiku,” Isaac Ribeiro akresenta.
Prezidente Asosiasaun Vendedór Merkadu Baucau, Daniel Soares dos Santos, hateten, liuhosi formasaun ne’e bele ajuda fó koñesementu ba mane sira kona-bá prevensaun violénsia bazea ba jéneru kontra feto no labarik feto, liuliu iha transporte públiku.
Jornalista : Natalino Belo
Editór : Evaristo Soares Martins
