DILI, 19 dezembru 2022 (TATOLI)—Sekretária Estadu Igualdade no Inkluzaun, Maria do Rosário Fátima Correia, kontinua enkoraja no motiva mídia nasionál sira iha Timor-Leste atu halo kobertura ba asuntu sensível jéneru no inkluzaun sosiál.
Notísia Relevante: SEII fó formasaun ba jornalista kona-bá kobertura sensivel ba jéneru
“Enkoraja nafatin mídia sira atu halo kobertura no reportajen sira sensível ba jéneru, maluk portadora defisiénsia, komunidade LGBTI (Lesbian, Bisexual, Gay, Transjender,no Inter-Sexual) no komponente vulneravél sira,” Sekretária Estadu Igualdade no Inkluzaun ne’e hateten ba jornalista sira, hafoin halo sorumutu ho jornalista no xefe redasaun sira, iha salaun Maria Gorrete, Dili, segunda ne’e.
Liuhosi sorumutu ne’e, SEII hakarak hametin komunikasaun ho mídia nasionál sira iha Timor-Leste liuhosi kobertura sensível jéneru no inkluzaun ho objetivu mak atu hametin koordenasaun serbisu entre SEII ho mídia sira hodi nafatin halo kobertura no publikasaun ba atividade serbisu SEII nian.
Iha enkontru ne’e partisipa hosi jornalista no xefe redasaun mídia nasionál sira hanesan Agência Tatoli, Impreza Públiku (TATOLI, I.P), Rádio Televizaun Timor-Leste, Empreza Públiku (RTTL, E.P), Timor Post, Independente, Neonmetin, Tempu Timor, Suara Timor Lorosa’e (STL), no SapoNews.
Surumutu ne’e partisipa hosi Diretór Jerál SEII, Armando da Costa no Diretora Nasionál Jestaun Planu no Estratéjia (DNGPE), Celeste Ramos Martins Gonçalves.
Notísia Relevante: CI sensibiliza Matadalan reportajen sensível jéneru ba mídia nasionál
Jornalista : Osoria Marques
Editór : Cancio Ximenes
