DILI,19 dezembru 2022 (TATOLI)— Sentru Hapara Fuma (SHF) iha Sentru Saúde Formosa, Munisípiu Dili, hahú hosi tinan 2021 to’o 2022, konsege hala’o tratamentu ka akonsellamentu ba fumadór na’in-887.
“Sentru Hapara Fuma hahú estabelese iha outubru 2021 to’o ohin, totál pasiente ne’ebé mak hala’o tratamentu iha ne’e na’in- 887, hosi númeru ne’e mane na’in-868 no feto na’in- 19”, Responsavél Sentru Hapara Fuma Médiku Jerál, Eldino de Castro Rangel, informa ba jornalista sira iha nia kna’ar fatin, Formoza, segunda ne’e.
Fumadór na’in-868 ne’e pasiente na’in-820 mak konsege rekuperadu ka la fuma sigaru no pasiente 30 mak konsege fuma fila-fali.
Tuir matadalan ne’ebé mak iha fumadór ne’ebé mak hapara fuma husi fulan-tolu ba leten nia la fuma, maibé iha mós pasiente balun ne’ebé mak fuma fila-fali.
Iha fumadór na’in-100-resin mak kontinua sei halo hela tratamentu tanba pasiente maioria mak sei depedénsia maka’as, nune’e presiza halo tratamentu adekuadu ba sira.
Tuir dadus fumadór sira ne’e maioria mai halo tratamentu ho idade joven hahú tinan 20 to’o 39. Daudaun, estoke ai-moruk tipu rua mak susfisiente hela mak taka de’it iha kulit no ida mak nata de’it.
Daudaun ne’e, Sentru Hapara Fuma estabelese ona iha munisípiu sira hanesan Dili, Ermera, Liquiça, Ainaro no Oé-Cusse. Tuir planu atu estabelese tan munisípiu Lautem no Viqueque.
Jornalista : Felicidade Ximenes
Editór : Florencio Miranda Ximenes
