DILI, 21 dezembru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei, ne’ebé aprezenta hosi Ministru Justisa, Tiago Amaral Sarmento, ba alterasaun dahuluk dekretu-lei númeru 10/2017, loron 29 marsu, kona-ba estatutu Defensoria Públika nian.
“Objetivu diploma ne’e atu promove atualizasaun no reforma estatutu Defensoria Públika, hodi adapta ho realidade atuál setór justisa nian. Liu-liu relasiona ho direitu asesu ba justisa no Tribunál sira hosi sidadaun sira hotu hodi presta direitu ho loloos,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: MJ planu halo alterasaun ba estatutu Defensória Públika
Portavós Governu dehan, relasiona ho estrutura organizativa Defensoria Públika, destaka entre mudansa prinsipál ne’ebé propoin hela kriasaun figura Defensór Públiku Jerál Adjuntu, ne’ebé tulun Defensór Públiku Jerál, no substitui iha ninia impedimentu no auzénsia sira, alterasaun regra nomeasaun ba Defensór Públiku Jerál, ne’ebé kabe ba Primeiru-Ministru no alterasaun kompozisaun Konsellu Superiór Defensoria Públika nian hodi halo Konsellu ne’e autónomu, dinámiku no funsionál liután, nune’e mós definisaun di’ak liu ba Defensoria Munisipál sira.
“Devér Defensór Públiku sira sei haluan iha tempu hanesan konsagra garantia no prerogativa foun no define ho loloos importánsia ba sira-nia misaun bazeia ba promosaun asesu ba justisa, liuhosi mekanizmu protesaun no informasaun jurídika,” Ministru akresenta.
Nune’e, iha ámbitu ho protesaun jurídika, determina ninia modalidade no ámbitu aplikasaun inklui simplifika regra prosedimentál a ba aprezentasaun, apresiasaun no desizaun kona-ba pedidu protesaun jurídika nian, ne’ebé submete hosi sidadaun sira.
Aleinde ne’e, haluan mós importánsia kona-ba konsulta no esklaresimentu jurídiku ne’ebé Defensoria Públika maka tenke garante liuhosi ninia Gabinete sira no estabelese mós kriasaun hosi klínika sira hodi asesu ba justisa.
Jornalista : Antónia Gusmão
Editora : Julia Chatarina
