TDD absolve António Conceição hosi kazu partisipasaun ekonomia no administrasaun danoza

DILI, 22 dezembru 2022 (TATOLI)— Tribunál Distritál Dili (TDD), kinta (22/12) ne’e, deside absolve arguidu eis-Ministru Komérsiu, Indústria no Ambiente, António Conceição “Kalohan”, hosi kazu partisipasaun ekonomia iha negosiu no krime administrazasaun danoza, maibé aplika pena multa ba iha arguidu-sira.
Iha akordaun TDD ne’ebé lee sai hosi Juiz prosesu, Ivan Suritai, katak razaun Tribunál absolve arguidu António Conceção “Kalohan” hosi krime rua ne’e tanba perante julgamentu krime sira ne’ebé Ministériu Públiku inputa ba iha arguidu sira la prense elementu krime, maibé kontinua aplika pena multa.
Notísia relevante:Defeza husu TDD absolve kazu eis-ministru António da Conceição “Kalohan”
Alende ne’e, Tribunál mós absolve totál arguidu eis-Diretór Jerál MCIA, António da Costa, hosi krime partisipasaun ekonómia iha negósiu, krime administrasaun danoza no krimi fasifikasaun no anotasaun téknika inklui laiha pena multa.
“Tuir Tribunál nia haree katak durante julgamentu ne’e faktu la komprovadu katak arguidu sira komete direta ba krime sira ne’ebé Ministériu Públiku imputa ba nian, no iha desizaun ne’e tribunál fundamenta razaun aplika pena absolvisaun ba arguidu tanba arguidu halo serbisu bazea ba orientasaun superiór la’ós ba nia individu”, refere akordaun ne’e.
TDD mós absolve arguidu Julmira Inacia Belo no Gaspar Policarpo Correia hosi kazu krime partisipasaun ekonomia no krime administrasaun danoza.
Enkuantu, arguidu Paul Manuel da Costa Soares Viana, absolvidu hosi krime administrasaun danoza no krime burla agravadu, maibé Tribunál kondena hodi aplika krime falsifikasaun anotasaun téknika.
“Tanba hafoin Tribunál haree ba faktu sira iha julgamentu entende katak, arguidu Paulo Viana iha faktu konprova katak komete duni krime falsifikasaun anotasaun téknika”, katak.
Maski nune’e, TDD aplika pena multa ba eis-ministru António Conceição “Kalohan” no arguidu nain haat sira seluk hanesan arguida Julmira Inacia Belo, Gaspar Policarpo Correia no Paulo da Costa Soares.
Nune’e, arguido Julmira Inacia Belo sei selu multa kada loron $5, Gaspar Policarpo Correia selu $7 kada loron no Paulo da Costa Soares Viana selu pena multa $7,50, durante loron 120. Enkuantu arguidu eis-Ministru António Conceição mak Tribunál aplika pena multa durante loron 180, no kada loron selu $10.
Alende ne’e, Tribunál absolve mós arguidu sira hosi pena indimizasaun sivíl ne’ebé mak antes ne’e iha alegasaun Ministériu Públiku.
Juiz Ivan Suritai deklara desizaun Tribunál mak ne’e, kuandu Ministeriu Públiku konsidera desizaun Tribunál Primeiru Intánsia ne’e la adekuandu no la justu bele rekorre desizaun ne’e ba Tribunál Rekursu.
“Ida ne’e mak desizaun Tribunál, sé Ministériu Públiku konsidera desizaun Tribunál Primeiru Instánsia la adekuadu no la justu bele rekorre desizaun ne’e ba Tribunál Rekursu”, Juiz Ivan Suritai afirma.
Notísia relevante:MP alega eis-ministru António Kalohan ho pena prizaun tinan lima
Jornalista: Natalino Costa
Editór : Florencio Miranda Ximenes

