Estoke ai-moruk antibiótiku mamuk iha sentru Saúde Guisarudo
DILI, 23 dezembru 2022 (TATOLI)—Asistente Enfermeira iha Sentru Saúde Guisarudo Munisípiu Ermera, Madalena Soraes do Reis, informa estoke ai-moruk bázika-sira liuliu antibiótiku mamuk iha sentru saúde Guisarudo, munisípiu Ermera, hodi difikulta profisionál saúde sira halo atendimentu ba pasiente sira.
“Ami nia estoke ai-moruk bázika menus loos no ai-moruk antibótiku mamuk, nune’e durante semana rua ami la halo tratamentu ba pasiente sira, nune’e iha loron 21 dezembru mak Servisu Saúde munisípiu Ermera haruka mai estoke natoon, maibé la sufisiente ba ami tanba ami nia pasiente iha Guisarudo ne’e barak”, Asistente Enfermeira iha Sentru Saúde Guisarudo, hateten ba Agência TATOLI via telefónika, sesta ne’e.
Tuir dadus hahú hosi fulan-outubru no novembru konsege rejista moras Infesaun Vias Respiratriu Aguda (ISPA) hamutuk 988.
“Iha fulan outubru, ami rejista kazu Infesaun Vias Respiratoriu (ISPA) hamutuk 557 no novembru hamutuk 431 ne’ebe afeta ba labarik nomós ema boot”, nia informa.
Moras ispa ne’e nia kauza mai husi rai-rahun hodi halo ema inus metin, mear to’o isin manas, nune’e profisionál saúde sira nafatin hala’o tratamentu ba sira to’o rekupera.
Alende ne’e, Sentru Saúde ne’e mós rejista moras diarea hamutuk 54 maioria labarik tinan ida mai kraik no mós moras la hada’et hanesan tensaun nomós gastritis.
Jornalista : Felicidade Ximenes
Editór : Florencio Miranda Ximenes
