BOBONARO, 24 dezembru 2022 (TATOLI)- Bispu Dioseze Maliana no Prezidente Konferénsia Epispokál Timorense (CET, sigla portugés), Don Norberto do Amarál, hateten Jesus nu’udar prezente ba sarani hotu hodi fó espíritu ba ema-ne’ebé tulun ona ema seluk bodi fó solusaun ba problema ida.
Notisia relevante: Natál nu’udar festa esperansa
Amu Bispu haklaken, sarani sira tenke simu domin Maromak nian ne’e ho atitude admirasaun.
“Nu’udar simu prezente ruma hosi ema ida, hafoin ida-ne’e ita sente laran kontente no fó obrigadu no hatene agradese, maibé obrigadu ida-ne’e sei kesi metin ho ida-ne’ebé fó no ida-ne’ebé simu,” mensajen ne’e hato’o hosi Bispu Dioseze Maliana iha ámbitu selebrasaun festa Natál tinan 2022 nian, iha Igereja Santa Cruz, Maliana, sábadu ne’e.
Tanba hahalok di’ak ne’e mak tuir kosok-oan hatudu ona ba sarani sira iha mundu.
Ho nune’e bele halo amizade kle’an, tanba Jesus nu’udar prezente ida-ne’ebé boot liu buat hotu-hotu.
Nune’e, Prezidente Konferénsia Epispokál Timorense ne’e hato’o boas festa, hahú hosi Prezidente Repúblika, Primeiru Ministru, deputadu sira iha Parlamentu Nasionál, Tribunál, liuliu ba sira iha munisípiu Liquiçá, Bobonaro no Suai no autoridade sira hotu.
Bispu Dioseze Maliana ne’e hateten, Natál nu’udar kalan ksolok, tanba Nai Maromak hatudu nia domin tomak ba mundu, tanba mundu iha hela nakukun no mate nia laran, nune’e Maromak boot ida-ne’e hafalun rai-klaran no mundu hodi fó ksolok ba sarani hotu.
Nia subliña, mundu bele haksolok ho ida-ne’e tanba domin Maromak nian fó onra ba ema-nia liman laran, tanba ne’e manifestasaun loron Maromak nian ne’e la’ós hanesan mundu nian, ne’ebé bele halo buat oioin mesak di’ak, maibé ikus mai namlaek, dodok no laiha folin.
Tanba domin Maromak nian ne’e fó ba ema hakmatek, trankuilidade, pás justisa, lialoos no domin ida-ne’ebé Maromak espíritu santu tún ba ema, haraik ba ema atubele sai Maromak nia oan-hakiak no bele asesu ba dalan ne’ebé lori ba Lalehen.
“Ne’e duni husu de’it ema atu simu domin ida-ne’e, hodi bele moris tuir Maromak nia dalan, to’o ikus mai tulun ema, atu ema bele hadomi Maromak ho neon no laran,” Prezidente CET ne’e hateten.
“Imi idak-idak mak hatene, nia mai selebra nia moris, haan hanesan ema, hanoin hanesan ema atubele loke ita-nia fuan ho laran, atu kosok-oan mai moris iha idak-idak nia fuan,” Bispu Dioseze Maliana ne’e haklaken.
Iha selebrasaun misa kalan Natál ne’e partisipa hosi autoridade munisípiu Bobonaro, autoridade sivíl, militár no sarani sira iha parókia Santa Cruz Maliana.
Notísia relevante: Dom Vírgílio: “Natál hametin unidade lori povu ba moris di’ak”
Jornalista: Sérgio da Cruz
Editór: Evaristo Soares Martins
