Benefisiáriu uma-kain rihun-32 resin iha Baucau simu ona subsídiu $200
BAUCAU, 27 dezembru 2022 (TATOLI) – Benefisiáriu uma-kain hamutuk 32.387 hosi postu admistrativu neen munisípiu Baucau simu ona subsídiu $ 200.
Diretór Serbisu Munisipál Solidaridade Sosiál Baucau, Guido Ricardo Belo, esplika, dadus loloos hamutuk 36.438 ho orsamentu millaun $7.287.60 maibé provizoriamente totál benefisiáriu ne’ebé simu ona hamutuk 32.387 no seidauk simu hamutuk 2.097.
“Ita finaliza pagamentu iha loron 22 dezembru, dadus simplisiku hotu ona, tanba de’it loron boot féria entaun foin hahú fali nune’e hela de’it relatóriu narrativa sira atu halo kompleta,” Diretór Serbisu Munisipál Solidaridade Sosiál Baucau informa ba Agência TATOLI iha Vila nova, tersa ne’e.
Benefisiáriu hosi postu Baguia hamutuk 3.277 no pagamentu hamutuk 3.071 enkuantu seiduak pagamentu hamutuk 261.
Postu Baucau Vila hamutuk 12.819, pagamentu de’it ba 11.951 enkuantu seidauk hamutuk uma-kain 868, postu Vemase hamutuk 3.307, pagamentu ona uma-kain 3.091 no seidauk hamutuk 216.
Postu Laga hamutuk benefisiáriu uma-kain 5.053, pagamentu ona uma-kain 4.788 enkuantu seiduak hamutuk 265, postu Venilale hamutuk 4.881, pagamentu hamutuk 4.618 no seidauk hamutuk 263.
Postu Quelicai hamutuk 7.101, pagamentu provizoriamente uma-kain hamutuk 4.868 no seidauk hamutuk 224, enkuantu dadus hosi suku tolu seluk seidauk relata hanesan Abu, Namanei no Afaça.
“Benefisiáriu balun la mai simu to’o data ditermina, tanba prosesu pagamentu tuir sistema entaun labele atu loke nune’e relatóriu ita finaliza de’it ona no orsamentu ita devolve hikas ba banku,” Guido Belo akresenta.
Hosi tótal dadus ne’ebé rejista, ekipa identifika iha benefisiáriu balun naran dupla, balun óbitu laiha familia agregadu, balun la prense rekezitu tanba idade ki’ik no balun la prezensa tuir oráriu ne’ebé ditermina ona.
Serbisu Sosiál Munisípiu Baucau rejista difikuldade no hakerek rekomendasaun iha relatóriu hodi hato’o ba nasionál hanesan rekursu umanu no transporte ne’ebé aloka ba fatin pagamentu limitadu no kondisaun estrada difikulta bainhira udan monu rai.
Entretantu, Munisípiu Baucau kompostu husi Postu administrativu neen hanesan Baucau Vila, Laga, Baguia, Quelicai, Venilale no Vemase.
No, Baucau vila ho nia suku sira mak hanesan Bahu, Bucoli, Buibau, Buruma, Caibada, Gariuai, Samalari, Seiçal, Tirilolo, Triloca, Uailili. Enkuantu, Laga nia suku sira mak Atelari, Libagua, Nunira, Saelari, Sagadate, Samalari, Soba, Tequinomata no Baguia nian mak Afaloicai, Alawa Kraik, Alawa Leten, Defawasi, Hae Coni, Larisula, Lavateri, Osso Huna, Samalari no Uacala.
Tuirmai, Postu administrativu Quelicai kompostu husi Suku Abafala, Abo, Afaça, Baguia, Bualale, Guruça, Lacoliu, Laisorolai de Baixo, Laisorolai de Cima, Lelalai, Letemumo, Macalaco, Maluro, Namanei no Uaitame.
Suku sira iha Venilale mak hanesan Bado-Ho’o, Baha Mori, Fatulia, Uai Oli, Uailaha, Uatu Haco, Uma Ana Ico, Uma Ana Ulo. No, Vemase kompostu husi Suku Caicua, Loilubo, Ossouala, Ostico, Uaigae, Uato-Lari no Vemase vila.
Jornalista : Natalino Belo
Editór : Rafael Ximenes de A. B.
