DILI, 27 dezembru 2022 (TATOLI)—Ministériu Edukasaun Juventude no Desportu (MEJD), tersa ne’e, realiza semináriu aprezentasaun estudu uzu lian portugés iha ensinu aprendizajen ba estudante primeiru no segundu siklu iha ensinu báziku, ne’ebé iha ámbitu ne’e aproveita aprezenta peskiza sira ne’ebé durante ne’e halo ona iha territóriu nasionál.
“Ha’u haree prosesu peskiza ne’e importante tanba iha relasaun ho ita-nia polítika no lejizlasaun kona-ba ensinu lian portugés. Peskiza ne’e ninia intensaun atu haree ba oin karik nafatin hanesan daudaun, ne’ebé tetun mak domina liu ou atu halo mós alterasaun ruma iha tinan 2023 ba mudansa ruma iha ensinu aprendizajen ba estudante primeiru no segundu siklu iha territóriu nasionál,” Ministru Edukasaun Juventude no Desportu, Armindo Maia, hateten iha semináriu aprezentasaun estudu uza lian portugés iha ensinu aprendizajen ba estudante primeiru no segundu siklu iha ensinu báziku, iha salaun Ian Martin, Instituto Nacional de Formação de Docentes e Profissionais da Educação de Timor-Leste (INFORDEPE), Balide.
Notísia relevante: MEJD ezekuta ona OJE 2022 hamutuk 92,5%
MEJD nafatin akompaña kondisaun profesór no estudante sira, nune’e hein iha rekomendasaun hosi peskizadór sira hodi bele sai matéria ba ministériu hodi bele hadi’a kondisaun.
Iha biban hanesan, Prezidente INFORDEPE, Manuel Gomes de Araújo, hateten, durante fulan-rua nia laran formadór no peskizadór sira halo peskiza kona-ba oinsá progresu utilizasaun ensinu lian portugés ba primeiru no segundu siklu iha territóriu nasionál.
“Estudu ida-ne’e atu hatudu dalan ruma atubele reforsa dezenvolvimentu lian portugés iha Timor-Leste, liuliu bele sai lian ofisiál ne’ebé konsagra ona iha Konstituisaun artigu 13.
Peskiza ne’e atu tulun ministériu liuhosi INFORDEPE atubele kria estratejia sira hodi kria formasaun di’ak liu ba profesór sira hodi bele hanorin portugés ho di’ak ba labarik sira atu kompreende hodi bele apreende ho lais liután.
“Rezultadu hosi peskiza ne’e ita sei hein hela prosesu aprezentasaun sira iha semináriu ne’e, depois maka ita sei haree konkluzaun hatudu saida. Tanba ne’e ita seidauk bele foti konkluzaun atu halo rekomendasaun,” nia tenik.
Jornalista : Tomé Amado
Editora : Julia Chatarina
