DILI, 22 dezembru 2022 (TATOLI)–Ministériu Edukasaun Juventude no Desportu (MEJD) ezekuta ona Orsamentu Jerál Estadu (OJE) 2022 atinje ona 92,5%.
Diretór Jerál Administrasaun no Jestaun Finansa hosi MEJD, Antoninho Pires, relata katak daudaun ne’e hela de’it balansu $6.191.072, 60, ne’ebé orsamentu hirak ne’e maka sei utiliza hodi kontinua selu saláriu no désimu terseiru ba funsionáriu sira.
“Ami-nia taxa ezekusaun OJE 2022 iha semana kotuk atinje 87%, maibé to’o ona horiseik atinje ona 92,5%, ho nune’e ami agora hein de’it pagamentu finál tanba sistema taka ona ne’ebé to’o fim do ano ne’e ami bele atinje to’o 98%, quer dizer falta de’it 2% maka ami la konsege kompleta,” Diretór informa ba Agência Tatoli, iha ninia Gabinete MEJD, Vila Verde kinta ne’e.
Notísia relevante: MEJD prevee millaun $7,2 atu atribui ba estudante mellor klasifikada
MEJD prevee orsamentu $93.673.908 ba tinan ne’e, ne’ebé hosi montante ne’e ezekuta to’o ohin loron atinje ona 92,5%, ho ninia balansu ezekusaun hela de’it $6.191.072,60, kompromisu $839.187,12, obrigasaun $2,624.017,07 no atuál $84.019.631,21.
“Osan ne’ebé restu sei hasai tan atu selu funsionáriu 19.000 resin ne’ebé atu koloka iha territóriu nasionál, kompostu hosi profesór 16.000 resin no funsionáriu 3.000 resin,” nia akresenta.
Enkuantu, direitu ba asesór sira atu hetan saláriu désimu terseiru bazeia ba lei tenke iha ekiparasaun persentajen ho saláriu diretór jerál sira.
“Tanba ne’e asesór balun hetan direitu ba saláriu désimu terseiru no balun sei la hetan tanba bazeia ba persentajen sira,” nia tenik.
Jornalista : Tomé Amado
Editora : Julia Chatarina
