SAMES destroi ai-moruk liu prazu iha Tibar
DILI, 27 dezembru 2022 (TATOLI)—Servisu Autónomu Medikamentu no Ekipamentu Saúde (SAMES), tersa ne’e, halo destroisaun ba ai-moruk liu prazu ne’ebé sosa husi Orsamentu Jerál Estadu (OJE) no mós apoia husi parseiru dezenvolvimentu sira iha lixeiru Tibár postu administrativu Bazartete, munisípiu Liquiça.
“Produtu sira ne’e, ita sosa tanba atu asegura moras sira, maibé bainhira to’o tempu liu prazu ona, nune’e ita tenke halo destroisaun tanba ita la konsege utiliza ai-moruk no konsumavél sira”, Diretór Ezekutivu Servisu Autónomu Medikamentu no Ekipamentu Saúde (SAMES) Santana Martins, hateten ba Agência TATOLI iha lixeiru Tibar.
SAMES halo abertamente relata ba públiku katak destroisaun ba ai-moruk liu prazu ne’e tuir duni rekomendasaun Organizasaun Mundiál Saúde (OMS) tanba menus hosi 5%.
“Ohin, halo destroisaun ne’e 2%, signifika ita esforsu hodi halo atendimentu ba populasaun sira. Maibé karik nia persentajen ultrapasa. Nune’e ita presiza avalia fila-fali hodi haree kona-ba ita nia atendimentu no produtu sira ne’ebé kompra tenke tuir planu ka tuir reseita ka moras ne’ebé eziste”, nia kompromete.
SAMES destroi ai-moruk tipu 153, kompostu hosi ai-moruk no konsumavél , hosi laboratóriu Nasionál Saúde hamutuk tipu 105 no mós kompañia Stamford medical iha tipu sia hanesan produtu narkotika no psychotropic.
Ekipamentu mediku ne’ebé destroi hamutuk 155, husi númeru ne’e ai-moruk tipu 107 no konsumavél ho tipu hamutuk 48 ho orsamentu hamutuk $473,237.68.
Ho totál orsamentu ne’e mai hosi Orsamentu Jerál Estadu $316,435.66, apoiu fundu global $93,444,21, UNICEF $ 434,81, UNFPA $32,742,60, WHO $26,050,56, UNDP $4,129.84.
“Ita mós halo destroisaun ba vasina COVID-19 vial hamutuk 2,190, husi ne’e vasina AstraZeneca ne’ebé apoiu hosi Austrália vial 870 no vasina Pfizer husi Estadu Unidu Amérika no UNICEF vial 1.320”, nia afirma.
Jornalista : Felicidade Ximenes
Editór : Florencio Miranda Ximenes
